Garcia nihatag og tulo ka adlaw sa CCENRO pag-imbestigar sa landfill

CEBU, Philippines — Ang hepe sa Cebu City Environment and Natural Resources Office (CCENRO) Reymarr Hijara gihatagan ni Acting Cebu City Mayor Raymond Alvin Garcia og tulo ka adlaw nga mohimo og imbestigasyon batok sa reklamo sa mga residente sa Sta. Ana Homeowners Association sa Barangay Binaliw batok sa usa ka landfill nga giingong baho kaayo.

Si Garcia niluwat sa maong kamandoan human niya nadawat ang 156 ka signatures gikan sa mga residente tungod sa ilang reklamo nga grabe kabaho sa maong landfiil.

Si Rosalinda Leogan, presidente sa Sta. Ana Homeowners Association nagkanayon nga ang ilang mga silingan ug sila mismo nakasinati og grabeng kabaho gikan sa landfill.

Matud ni Leogan nga dagko na kaayo ang langaw diha sa ilang lugar ug nihangyo sila ni Garcia nga matabangan sa mao nilang problema.

Si Garcia nimando sa hepe sa CCENRO ug nihatag og authority niini nga mosumiter sa iyang report sulod sa tulo ka adlaw ug mosulod sa maong landfill aron masuta kong ang  nagdumala sa labayanan sa basura nisubay sa balaod.

Ug kong makadawat na siya sa report ug rekomendasyon sa CCENRO mobisita siya sa landfill o ipatawag sa iyang opisina ang tagdumala aron paminawon ang ilang habig ug patubagon sa ilang mga gihimo ubos sa rekomendasyon o report nga iyang nadawat.

Gimandoan usab ni Garcia ang City Health Department nga mohimo og water analysis sa kahimtang sa tubig sa maong dapit kong wala ba kini maghatag og peligro sa mga residente.

Samtang si Hijara nagkanayon nga mopahigayon sila og joint inspection sa city health aron masayran ang mga pamaagi nga gihimo sa pag-dispose sa mga basura.

Susihon usab nila ang source sa baho, asa moagi ang tubig gikan sa ulan ug uban pa. (BANAT NEWS)