Hotel gipasira ni Chan

CEBU, Philippines — Gipangunayan ni Lapu-Lapu City Mayor Junard "Ahong" Chan ang pagpatuman sa "closure order" batok sa Tourist Garden Hotel and Restaurant sa Barangay Agus sa Siyudad sa Lapu-Lapu nga nadiskubrehan nga nag-operate og ilegal nga Philippine Overseas Gaming Operation (POGO).

Apil sa gipasirad-an ang tanang patigayon o establisamento diha sa suds a maong compound nga naglakip og convenience store, KTV Bar and Restaurant ug uban pa.

Matud sa mayor, ang iyang pamahayag sa miaging buwan nga walay POGO sa siyudad gibase lang niya sa mga business permits nga gilukat sa mga negosyante. 

Giangkon niya nga nakurat siya sa pagkadiskubre sa POGO diha sa sud sa maong hotel nga lahi man ang ilang permits nga gikuha.

Sa pikas bahin, si Cebu City acting Mayor Raymond Alvin Garcia niklaro nga wala pay kasigurohan kun wala bay POGO hub o POGO-like nga operasyon sa Cebu City mao nga subsob karon ang ilang gihimong inspeksyon sa mga establisamento.

Apan base sa rekord sa Business Permits and Licensing Office sa City Hall, walay negosyo nga nakarehistrong sama niini dinhi.

Dunay mga establisamento nga una nilang gidudahan apan nasuta nga mga legal kini nga  e-games ug dili POGO.

Apan bisan pa niini, dili gusto ni Garcia mahitabo sa siyudad ang nahitabo sa Lapu-Lapu City nga diin dunay sekretong POGO hub sa sud sa usa ka hotel nga dunay legal nga mga permits sa nagkalainlaing patigayon sa sud.

Sa pagkakaron, gitutokan sa inspeksyon ang mga hotels ug mga condominiums nga mahimong adto patago nag-operate ang POGO.

Sa pikas bahin, ang tigpamaba sa PRO-7, Lt. Colonel Gerard Ace Pelare nagkanayon nga dunay mga establisamento silang gipanid-an karon.

Kahinumduman nga ang National Bureau of Investigation(NBI),  Presidential Anti-Organized Crime Commission (PAOCC), Inter-Agency Council Against Trafficking (IACAT), Bureau of Immigration, Department of Social Welfare and Development mironda sa POGO hub sa usa ka hotel sa Barangay Agus, dakbayan sa Lapu-Lapu niadtong Sabado diin 169 ka mga Chinese, Burmese, Malaysians ug Indonesian ug walo ka Pilipino ang nadakpan. (BANAT NEWS)