Grandiyosong pagtak-op sa Palaro ang idalit

CEBU, Philippines —  Usa ka grandiyoso nga pagtak-op sa Palarong Pambansa 2024 dinhi sa Dakbayan sa Sugbo ang mapaabot karong adlawa, Martes, human opisyal nang matapos ang dakong kalihukan sa paugnat sa kusog nga gisugdan sa nilabay nga semana.

Si Adolf Aguilar, Assistant Schools Division Superintendent sa Department of Education Cebu City miingon gipaabot nilang motambong si Vice President Sara Duterte, Senador Imee Marcos uban sa iyang anak Governor Matthew Manotoc sanglit sila maoy modawat sa tahas sa Palarong Pambansa 2025.

Dugang pa ni Aguilar, anaa usab ang mga city officials ug si Cebu Governor Gwendolyn Garcia tungod kay sila maoy host sa closing ceremonies karon, duna say presentasyon ang Pasigarbo sa Sugbo para sa mga bisita.

Gipahibalo usab ni Aguilar nga unang higayon kini sa kasaysayan sa Palarong Pambansa, nga mogamit ug 3D mapping technology ug lakip usab sa pagpahigayon sa fireworks display.

Si Aguilar, nitug-an nga anaa sa City Government ug Cebu Provincial Government kung unsaon nila pagpanghatag ang mga tickets.

Motambong sab ang gikan sa Zamboanga City, Misamis ug Agusan sa Mindanao kinsa ni-bid usab alang sa pagpahigayon sa Palarong Pambansa 2026 sa ilang dapit.

Si acting Mayor Raymond Alvin Garcia, mapasalamaton sa Cebu Provincial Government sa pag-abag tungod kay nakadaginot sa pundo ang siyudad.

Ang mga tickets sa closing ceremony bahin-bahinon ngadto sa Cebu Provincial Government, sa kabarangayan, kabatan-onan ug mga trabahante sa Cebu City Hall.

Sa pikas bahin, gipaneguro sa Police Regional Office(PRO)-7 nga malinawon nga mapahigayon karong adlawa ang kalihokan.

Matud ni Police Lieutenant Colonel Gerard Ace Pelare, tigpamaba ni Police Regional Office-7 Director Brigadier General Anthony Aberin nga nihimo sila og final security conference para niini.

 Gikalipay matud pa ni Aberin sa security coverage nga gihimo sa Cebu City Police Office, Cebu Police Provincial Office, Mandaue City Police Office ug Lapu-Lapu City Police Office dili lang sa Palarong Pambansa 2024 apan apil na asa ubang mga kalihukan sama sa National Schools  Press Conference, National Festival of Talents ug Learners Convergence.

Ang tulo ka mga kalihukan nga gihimo sa dakbayan sa Carcar, siyudad sa Naga ug dakbayan sa Lapu-Lapu natapos na sab. (BANAT NEWS)