3,612 nasikop nga nakalapas sa ordinansa sa Lapu-Lapu

CEBU, Philippines — Nadakpan sa usa ka semana nga operasyon sa kapolisan sa Lapu-Lapu City Police Office (LCPO) ang 3,612 ka mga tawo tungod sa nahimo nilang paglapas sa gipatuman nga lokal nga mga ordinansa.

Si Police Lieutenant Colonel Christian Torres, tigpamaba sa LCPO miingon nga ang usa ka semana nilang operasyon nagsugod sa Mayo 4 hangtud sa Mayo 10, 2024.

Naglakip sa mga ordinansa nga hugot nga gipatuman mao ang pagdili sa pagpanigarilyo sa publikong lugar ug ang pag-inom og ilimnong makahubog.

Tungod kay ang dakbayan giisip man nga tourist destination apil sa gihugtan nga ordinansa mao ang pagdili sa mga tawo nga mogawas sa ilang panimay nga maghukas.

Dugang pa ni Torres nga nagpadayon usab ang ilang paghipos sa mga minor de edad nga maglaroylaroy sa kadalanan nga lapas na sa alas 10 ang takna sa kagabhion tungod usab sa gihingusgan nilang pagpatuman sa curfew ordinance sa mga minor.

Ang maong gidaghanon sa nadakpan maoy resulta sa 437 ka mga operasyon nga ilang gipahigayon ug nakakolekta sila og Php 697, 600.00 gikan sa nabayran nga mga multa. (BANAT NEWS)