Tulo ka kilong shabu nasakmit gikan sa duha ka babaye

CEBU, Philippines — Nasakmit sa hiniusang operasyon sa kapolisan sa Lapu-Lapu City Police Office (LCPO) ang 3,000 gramo o tulo ka kilong gituohang shabu nga nagkantidad og Php 20,4000.00 gikan sa duha ka mga High Value Individual (HVI) nga pushers nga mga babaye nga ilang nadakpan sa buy bust operation diha sa Sitio Basak Merkado sa Barangay Basak, Siyudad sa Lapu-Lapu alas 10 pasado ang takna sa Miyerkules sa gabii Mayo 8, 2024.

Si Police Lieutenant Christian Torres, pangulo sa City Investigation Detection and Management Unit (CIDMU) ug tigpamaba sa LCPO ang dinakpan giila lang nila una sa mga angga nga sila si Gaga, 44 ug Eng-eng, 26 nga pulos nagpuyo sa Sitio Basak Merkado

Matud pa ni Torres ang buy bust operation  gipangulohan nila ni Major Judith Besas, hepe sa Presinto 4 sa LCPO, Police Major Dindo Alaras, pangulo sa CIU ug deputy niini nga si Police Captain Abraham Igot. Matud pa ni Torres, taudtaud na nga gipanid-an sa team sa kapolisan sa LCPO ang illegal nga kalihokan sa maong lugar hangtod nga gihimo ang buy bust operation nga maoy hinungdan sa ilang pagkasikop.

Si Police Colonel Ali Baron, Officer-In- Charge Director sa LCPO miingon nga ang pagkasikop sa duha resulta sa walay hunong nilang operasyon pagpakgang sa illegal drugas.

Si Mayor Junard "Ahong" Chan mihangop sa kalampusan sa operasyon sa kapolisan miingon nga ang pagkasikop sa duha nagpadayag lamang nga walay luna sa ilang dakbayan ang mga drug pushers.

Sa pikas bahin, nadakpan sa kapulisan sa Labangon Police Station sa Cebu City Police Office(CCPO) ang usa ka 48-anyos nga lalake sa buy-bust operation sa Sitio Callejon, Barangay Labangon,  siyudad sa Sugbo gabie sa adlaw'ng Miyerkules.

Ang suspetsado mao si Dexter Remolado Magkilat alyas Titing, 48, residente sa naasoy nga lugar nakuhaan og 10.2 grams sa gituohang shabu nga nagkantidad og P69,700.  Sa impormasyon sa Labangon Police Station ang suspetsado dihang nakagawas sa prisuhan sa miaging tuig gipaninglan kini sa iyahang utang sa illegal nga drugas.  Kini maoy rason nga nibalik sa pagpamaligya og illegal nga drugas ang suspek aron ma rolling ang kwarta ug makabayad siya sa iyahang utang.

Ang mga dinakpan gikatakda kining pasakaan og kasong kalapasan sa Section 5 ug 11, Article II sa Republic Act 9165.

Sa kinatibuk-an, moabot na tanan og 18 ka mga nalambigit sa ilegal nga drugas ang nasikop sa tanang mga operatiba ubos sa Police Regional Office(PRO)-7 gikan sa Mayo 8 hangtod na sa petsa 9 ning tuiga. — Rowena Capistrano, Decemay P. Padilla (BANAT NEWS)