PRO-7 andam na sa pagbisita ni Marcos karon
CEBU, Philippines — Andam na ang security coverage sa Police Regional Office (PRO)-7 alang sa pagbisita ni Presidentw Ferdinand “Bongbong” Marcos, Jr., dinhi sa Sugbo karong adlawa.
Nasayran nga duha ka kalihokan ang tambongan ni Marcos sa iyang pagbisita karong adlawa nga gilangkuban sa 503rd Anniversary sa Kadaugan sa Mactan nga ipahigayon diha sa Mactan Shrine ug ang capsule laying sa Mactan Newtown Expo sa Dakbayan sa Lapu-Lapu.
Matud ni Police Lieutenant Colonel Gerard Ace Pelare, tigpamaba sa PRO-7 nga nakig-alayon na sila sa ubang law enforcement agencies alang sa pagbisita sa president dinhi sa Sugbo.
“Of course, I don’t need to mention the number of personnel to be deployed pero ang atong assurance is based on intelligence estimates we are ready as far as security measure is concern”, padayag ni Pelare. Nagkanayon si Pelare nga gibalik-balik og pahinumdom ni Police Brigadier General Anthony Aberin, direktor sa PRO-7 ngadto sa mga sakop niini nga ma-deploy sa mga kalihokan nga preparado ug mosunod lang sa basic.
“Ang gidili nato, I would like to clarify kining gaduwa og cellphone or nag-scroll og mga social media accounts nga unrelated sa trabaho pero kong during emergency cases wherein you need to report or you need to ask for additional manpower of course it’s allowed”, padayag ni Pelare.
Nasayran nga walay na-monitor nga hulga ang kapolisan subay sa pagbisita ni Marcos.
Gipasalig sa kapolisan nga ipaniguro nila nga luwas ang pagbisita sa pinakataas nga opisyal sa nasud pinaagi sa pagpatuman sa hugot nga seguridad. BDB BANAT NEWS
- Latest
