Mga provincial hospital giawhag magkugi pagproseso sa Philhealth

CEBU, Philippines — Giawhag ni Gobernador Gwendolyn Garcia ang mga hepe sa 16 ka provincial ug district hospitals sa Probinsya sa Sugbo nga kinahanglan “efficient” o magkugi sa pagproseso sa claims gikan sa Philippine Health Insurance Corporation (PhilHealth).

Kini gumikan kay nahimong hagit karon sa Probinsya ang pagbawi sa kakulang sa revenue og kita tungod kay gibalibaran sa PhilHealth tungod sa pipila ka rason sama sa wala makacomply sa mga gikinahanglan nga dokumento ug nilapas na sa 60 ka adlaw nga deadline sa pagfile nga maoy niresulta sa kakulang sa kita.

Tungod niini, niawhag si Garcia ngadto sa mga hospital administrator ug sa PhilHealth nga han-ayon ang proseso aron masiguro nga ang tanang rekisitos nga dokumento masumiter sa saktong oras.

“Tabang mo, kadtong mga kabus mao na lang gayud atoang unahon. They deserve number one, topnotch services. You walk the extra mile,” matud ni Garcia ngadto sa mga chief of hospitals.

Segun sa Sugbo News, ang news portal sa Probinsya sa Sugbo nga mihimo usab karon og lakang ang Kapitolyo aron mamonitor ang revenue o kita niini pinaagi sa bag-ong software nga gitawag og “Medical Census” diin nag require kini sa mga hospital nga mosumiter sa datus niini matag quarter apil na ang mga pangalan sa mga pasyente, ug ang kantidad sa assistance nga nadawat gikan sa PhilHealth, kinatibuk-an nga bill ug kon adunay discounts.  MEL BANAT NEWS