Lapid ni-resign isip OIC general manager sa MCWD

CEBU, Philippines — Hingpit na nga ni-resign isip appointed OIC general manager sa Metropolitan Cebu Water District si Atty. John Dx Lapid kagahapon human niya gikonsiderar ang kamahinungdanon sa iyang pamilya.

Si Lapid gitudlo kini sa Local Water Utilities Administration (LWUA) sa maong posisyon.

Gibutyag ni Lapid nga gihilakan kini sa iyang asawa ug gikapoy na usab siya diin na- stress siya sa nahitabo sa LWUA ug MCWD. Nasayran nga “on leave” kagahapon si Lapid tungod kay gusto niini nga mopahuway.

Nagkanayon si Lapid nga gisuwayan niya ang pag-fight alang sa husto apan wala na siya’y gana tungod kay nasudlan na kini og politika ug dili usab siya ganahan nga gamiton sa politika.

Kagahapon gitak-op ang mga transaksiyon sa MCWD ug matud ni Lapid nga wala siya’y kalibutan niini.

Giangkon ni Lapid nga na-pressure siya tungod kay nalakip na ang iyang pamilya ilabi na sa mga pagbiay-biay ug uban pa. Si Lapid unom ka tuig kining nag-alagad sa MCWD isip division chief sa costumer care diin iyahang gidawat ang maong tanyag human walay nidawat niini ug matagan usab og kahigayonan nga matubag ang mga alegasyon batok sa MCWD.

Sa maong nagpadayon nga kaguliyang sa MCWD ang mga konsumidor maoy naapektohan human temporaryo kini nga nitak-op sa ilang operasyon tungod sa giingong pagpasirado niini sa city hall. Naminghoy ang pipila ka mga konsumidor human wala matigayon ang ilang katuyoan diha sa maong buhatan diin kasagaran kanila mobayad unta sa ilang obligasyon aron dili maputlan sa koneksiyon sa tubig apan walay modawat sa transaksiyon tungod kay sirado ang maong buhatan.

Base sa official statement sa MCWD ngadto sa mga konsumidor gipahibalo nila nga mitak-op una sila sa ilang nag-unang serbisyo kagahapon tungod sa gihulagway nilang invasion nga gihimo sa ilang buhatan nga naghatag og kabalisa ug kahadlok ngadto sa mga empleyado.

Ang maong buhatan nangayo og pasaylo sa kahasol ug nipahibawo nga dili sila mopatuman og disconnection hangtud maresolba ang isyu.

Adunay gipahimutang nga mga ali sa mga karsada padulong sa MCWD diin adunay mga gabantay nga mga kawani sa Cebu City Hall.  

Gisuwayan og tawag sa Banat News ug DyRF 1215 ang city administrator sa Cebu City Atty. Collin Rosell apan wala kini motubag ug mohatag og pamahayag kalabot niini lakip usab si Mayor Michael Rama nga gitawagan sa iyang line of communication. BDB BANAT NEWS