500 ka mag-uuma makadawat og ayuda gikan sa siyudad

CEBU, Philippines — Dili mominos sa 500 ka mga mag-uuma sa Dakbayan sa Sugbo ang gipaabot nga makadawat sa ilang ayuda gikan sa siyudad karong umaabot nga mga adlaw.

Suma pa ni konsehal Joel Garganera nga ang mga mag-uuma nga makadawat sa ayuda mao kadtong naapektuhan ang ilang mga pananum sa grabeng kainit mugna sa El niño.

Lakip sa ilang madawat mao ang bugas gikan sa dakbayan sa Sugbo.

Dugang pa ni Garganera, ang maong 500 ka mag-uuma mao ang ilang na identify gikan sa 10mil ka farmers sa siyudad, diin ang budget para sa ipanghatag kanila adto kuhaon sa City Disaster Funds.

Si Garganera nitug-an nga sa pagka karon wala pa silay figure kung pila ang kinatibuk-an nga danyos kun kadaut bisan 50 percent na sa kayutaan sa kabukiran ang apektado sa El niño tungod kay aduna may uban nga mga mag-uuma ang wala usab mananom.

Sa laing bahin gihatagan nalang kutob sa Abril 12, 2024 Biyernes ang mga person with disability PWD nga mokuha sa ilang financial assistance nga tag 3mil pesos sa buhatan sa City Treasurers Office.

Ang maong pahibalo giluwatan ni Precious Bordalba ang Focal Person sa PWD.

Sumala pa ni Bordalba ang pag-apod-apod gisugdan niadtong nilabay nga Biyernes Abril 5.

Kadtong mga PWD nga dili na makakuha sa ilang financial assistance ang gihatod nalang sa ilang tagsa-tagsa ka panimalay.

Ang madawat nga financial assistance sa mga pwd gikan sa buwan sa Enero, Pebrero ug Marso. MEL BANAT NEWS