Upat ka tawo nabiktima sa fixers sa pantalan

CEBU, Philippines — Upat ka mga tawo gikan sa Negros ug Capiz nga mopadulong unta sa Tagbilaran City sa Bohol ang nabiktima sa mga fixers samtang mokuha unta sila ug ticket.

Usa sa mga pasahero nga si Jem kinsa exclusive nga nahinabi sa Banat News/DyRF1215 nibutyag nga niabot siya sa Pier 1 kay moadto sa Tagbilaran City niadtong Domingo.

Dihang dunay nisugat nila nga lalake nga nitanyag nga motabang aron mapadali ang paglukat og ticket ug sila na ang molukat ug nangayo og P1, 200 ingon man ID aron sila na ang mokuha.

Sumala pa ni Jem, tungod kay wala siya masayod ug unang higayon niya sa Cebu City agi sa pantalan mao nga nagpakuha siya ug ticket nga business class nga 1,200 apan nahikurat siya sa pagbalik sa maong lalaki kay 800 ra ang nakabutang sa ticket.

Gitug-an ni Jem, iyahang gikwestyon ang maong mga lalaki apan ilang tubag nga ang 200 under the table ug ang 200 para sa ilaha kay naghago sila og process.

Samtang laing tulo ka mga pasahero gikan sa Capiz ang nabiktima usab sa fixers, diin matud pa ni L, ninaug sila sa taxi naunhan sila sa pagduol sa mga fixers ug giingnan sila nga alas dos ang last trip.

Sumala pa ni L, paspas kaayo ang panghitabo diin gipangayoan sila ug tag 1,100 matag usa nila lakip sa ilang i.d apan sa pagsusi nila sa ticket didto na sa barko tag 800 lang.

Gipangayoan pa sila ug 200 nga tip ug 200 nga Transportation.

Gipadayag ni L, tungod kay unang higayon nila sa Cebu ug hagip-ot na ang ilang oras hinungdan nga wala na silay nahimo ug igo nalang sila sa paghatag.

Ang tigpamaba sa Cebu Port Authority Maryknoll Bolasa, nibutyag nga wala pa sila makadawat ug report bahin niini ug mahimo ra ang mga biktima makig-alayon sa ilang buhatan.

Pahimangno nila sa mga pasahero nga adto gayud sa mga authorized ticketing outlets o kung aduna silay higayon sa online booking. — MEL BANAT NEWS