Rama mitawag ni Garcia nga “mananapaw”

CEBU, Philippines — “Mananapaw”, mao kini ang paghulagway ni dismissed Cebu City mayor Michael Rama ngadto sa iyang kanhi kaalyado nga si Mayor Raymond Alvin Garcia.

Gani, gikwestyon ni Rama ang paglingkod ni Garcia isip mayor sa dakbayan mao nga nimando siya sa iyang mga abogado nga pasakaan niya og kaso si Garcia tungod kay para niya, imbalido ang pagka-mayor niini karon.

“I have been telling my lawyers, file all cases available against sa mananapaw. That is my direction. We have substantial legal basis,” paghimug-at pa ni Rama atol sa atol sa press conference kagahapon.

Kahinumduman nga gisuspenso si Rama sulod sa unom ka buwan ug si Garcia ang natuboy isip acting mayor apan sa dihang mibuto ang balita niadtong Oktubre 3 nga nagpahamtang og “dismissal from office and perpetual disqualification due to nepotism and grave misconduct charges” ang Ombudsman sa laing kaso ni Rama, gipapanumpa si Garcia isip full-pledged mayor naidtong Oktubre 9.

Human sa maong pagpanumpa ni Garcia, gitug-an ni Rama nga gitangtangan siya og detailed police escort nga mao unta ang moprotehir sa iyang seguridad.

“I felt I wasn’t treated decently. Desente man ko nga tawo pero wala man ko tagai og desente nga treatment,” padayag ni Rama.

“I know I have not done anything illegal, and therefore why should I deserve this persecution?”, dugang pa ni Rama.

Gitug-an ni Rama ang iyang kaatbang sa politika nangita gyud og buslot sa iyang pamalakad sa City Hall.

“Dili man gyud na sila kita og sayop nako. Ingon ko nga wa koy kawat, sigi gyud pangita og kawat hangtud naabot sa nepotism. Agay, sakita sa akong dughan ana,” suma pa ni Rama.

Mitug-an sab ang kampo ni Rama nga hangtud karon wala pa gihapon sila makadawat og opisyal nga kamanduan gikan sa Ombudsman mahitungod sa maong hukom nga mikatap na sa social media.

Tungod kay walay igong basehan sa iyang kaso, gihimug-atan sab ni Rama nga dili sab gyud niya dawaton ang tawgon og “dismissed mayor.”

Tuod man, bisan sa mga panghitabo sa kinabuhi ni Rama isip usa ka politiko, dako ang iyang pasalamat nga nahinayon ang iyang kasal ngadto sa iyang kapikas nga si Malou Rama.

Gipasalamat sab niya nga nahatagan siya og temporary restraining order gikan sa Korte Suprema aron dili madayon ang pag-rebukar sa Comelec sa iyang kandidatura pagka-mayor pagusab. Dugang pa, puno ang iyang kasingkasing sa pasalamat tungod kay nagsaulog sab siya sa iyang ika-70 nga adlaw’ng natawhan. — IBM BANAT NEWS