Atletang kabataan sa Minglanilla gipasidunggan
CEBU, Philippines — Gipasidunggan sa lungsod sa Minglanilla ang ilang mga kabataang atleta nga nagdala og dungog para sa lungsod sa bag-o palang nahuman nga Palarong Pambansa didto sa kaulohan.
Ang mga batang lalaki gikan sa Minglanilla Central School nga nisalmot sa 12- under basketball category miuli bitbit ang bronze medal.
Giila sab sila isip ang most disciplined team samtang nagpadayon ang kompetisyon tungod sa ilang disiplina ug wala magpabadlong didto.
Samtang si Bernard Anton Alsola sa Barangay Ward 1 ang nakadawat og individual award diin siya napilian isip usa sa Mythical 5.
Samtang gipasidunggan sab sa mayor si Laarni Adlawan kinsa nakakuha og bronze medal sa 400m relay. Si Adlawan gikan sa Lipata SPED Center.
Ang kagamhanan sa Minglanilla wala nipakagamay sa ilang kalampusan ug niila niini isip nagdala og dakong dungog sa Minglanilla.
Si Mayor Rajiv Enad miingon nga iyang ikapasigarbo ang kabataan sa lungsod nga nipakita sa ilang abilidad sa paugnat sa kusog atubangan sa ubang mga atleta gikan sa nagkalainlaing dapit sa nasud. (BANAT NEWS)
- Latest
