Dinakpan nga wanted miambak sa patrol car

CEBU, Philippines — Wanted person nga nadakpan sa CIDG Negros Oriental PFU ang naka-ambak gikan sa gisakyan niining service vehicle didto sa Bato Sibonga niadtong Domingo mga alas 8 sa gabii.

Ang misuway og ikyas mao si Joshua Bairoy Amparado, 24, nga dunay kasong homicide ug usa ka construction worker ug residente sa Barangay Kamboylao, Bais City Negros Oriental, nga dalhon unta sa Negros Oriental.

Ang suspek nga gipusasan niambak sa sakyanan ug nisutoy og dagan ug tibuok gabii kining gipangita sa kapolisan uban sa mga barangay tanod.

Malampuson kining nasikop og balik mga alas 9 sa buntag Hulyo 10, 2023 pinaagi sa gihimong hot pursuit operation sa kapolisan sa Sibonga nga gipangulohan sa Deputy Chief of Police nga si Police Captain Elmer G. Opsima ubos sa pagdumala sa ilang hepe nga si Police Captain Fort Anthony A. Valdez, uban sa mga sakop sa CIDG Negros Oriental PFU.

Matud pa ni PCPT Opsima nga ang maong wanted nadakpan sa syudad sa Sugbo og gi-transport kini agi sa Tangil Dumanjug apan nilayat sa sakyanan pag-abot sa barangay Bato bukid sa Sibonga.

Gumikan sa panag-alayon sa mga otoridad nadakpan kini didto sa Barangay Lamacan sa nahisgutang lungsod. Jhayrei Pintac, Dannah Pogado, CNU Interns/Romeo Marantal

Mga pag-uwan, bagyo masinati bisan sa El Niño-PAGASA

Gibana-bana sa Philippine Atmospheric, Geophysical, and Astronomical Services Administration nga 11 hangtod 14 ka mga bagyo ang posibleng mosulod sa Philippine Area of Responsibility (PAR) sugod niining buwan sa Hulyo hangtod sa Disyembre ning tuiga.

Kini bisan pa sa nasinati na karong El Niño sa Pilipinas sugod ning buwan sa Hulyo nga gipaabot molungtad hangtud sa unang quarter sa tuig 2024. Tulo hangtud upat ka bagyo ang gipaabot nga mosulod karong buwana.

Base sa gipagawas nga update sa PAGASA niadtong Hunyo 27, makasinati og sobra sa normal nga panahon ang Luzon, Visayas ug Mindanao samtang normal nga klima ang sa Davao del Sur.  Sa buwan sa Agosto makasinati og mainiton nga klima ang Pilipinas gawas lang sa pipila ka bahin sa Luzon, Visayas ug Caraga Region. Gibanabanang duha ngadto sa tulo ka mga bagyo ang masinati sa buwan sa Agosto.

Ang Septyembre posibleng masinati ang kainit sa panahon sa pipila ka bahin sa Luzon, Visayas ug Central Mindanao, gawas lang sa Davao del Sur diin posibli kining makasinati og madag-umon nga mga kalangitan.

Samtang madag-umon nga kalangitan usab ang posibleng masinati sa Oktubre kay 40% hangtod sa  45% ang posibilidad nga dunay mga pag-uwan, apan makatagam-tam usab og normal nga klima ang Mindanao, gawas sa Caraga Region.  Anang buwana posibleng masinati ang bati nga panahon tungod sa duha ngadto sa tulo ka mga bagyo nga posibling mo sulod sa Philippine Area of Responsibility (PAR).

Ang buwan sa Nobyembre magdala usab og madag-umon nga kalangitan sa Visayas ug Mindanao, gawas niini anaay 50% hangtod sa 60% nga siyansa sa posibling pag-uwan laing bahin sa Pilipinas, diin base sa gipagawas nga Powerpoint Presentation sa PAGASA adunay syansa sa usa ngadto sa duha ka bagyo ang mosulod sa maong buwana. 

Daku ang posibilidad nga sa buwan sa Disyembre magdala usab ug madag-umon nga kalangitan sa kadaghanang bahin sa Pilipinas diin nakita sa PAGASA nga posibling anaay usa hangtod sa duha ka mga bagyo ang masugatan sa buwan sa pasko.

Base sa monitoring sa PAGASA ang pagdag-um, panugdog ug kilat, ug mga pag-uwan mokalma sa katapusang bahin sa 2023 ug sa unang quarter sa 2024.

Apan padayon gihapon ang pagmonitor sa El Nino bisan pa man sa umaabot nga buwan sa tag-uwan.  Matud pa sa PAGASA Weather Specialist nga si Daniel James Villamil, ang mga nagkatag nga uwan nga anaay pagdugdug ug pagkidlat sa Visayas, Mindanao ug silangang bahin sa habagatang Luzon kay dala sa localized thunderstorm.

Apan sa pagkakaron wala pay mga nakita ng Low Pressure Area o posibleng bagyo sulod ug ingon man sa gawas sa Pilipinas. (BANAT NEWS)