Nagpatay sa mga iro, caretaker sa dog shelter gipangita sa kapolisan

CEBU, Philippines —  Padayon nga gipangita sa kapolisan sa Dakbayan sa Sugbo ang mga responsable sa nahitabo mga iro diha sa Barangay Guadalupe ug Adlaon niining siyudad.

Sa niaging semana lima ka iro diha sa Barangay Guadalupe ang napalgan nga wala na’y kinabuhi ug gituohan nga gihiloan tungod sa blue-green substance nga nakit-an.

Sa Barangay Adlaon usab usa ka dog shelter diha sa maong lugar ang giabandonar nga niresulta sa pagkamatay sa napulo ka iro ug dul-an sa 100 ang gi-rescue sa Cebu City Government.

Si Police Colonel Ireneo Dalogdog, direktor sa Cebu City Police Office nagkanayon nga ang tag-iya sa lima ka iro dili na interesado nga mopasaka og kaso batok sa naghimo sa krimen apan padayon ang ilahang paningkamot aron mahibaw-an ang responsable sa maong hitabo diin kalapasan kini sa Akata Republika 8485 kun “Animal Welfare Act”.

Samtang hangtud karon gipangita pa sa CCPO si Lorna Oberes ang caretaker sa dog shelter diha sa Barangay Adlaon nga giingong niabandonar 100 ka iro.

Nahibaw-an sa kapolisan nga si Lorna kun adunay makita nga iro dalhon niya kini diha sa shelter apan wala nay ikasustenir sa pagpakaon hinungdan nga adunay mga iro nga nakahatag usab og kadaot sa hayopan ug ubang gamit sa mga silingan tungod sa kagutom.

Irekomendar sa CCPO nga pasakaan og kaso si Lorna.

“Sa pagkakaron wala pa nato nakit-i si Lorna, gi-recommend nato nga siya pasakaan og kaso kining violation sa Republic Act 8485 otherwise known as Animal Welfare Act”, matud ni Dalogdog.

Giawhag ni Dalogdog ang publiko nga kon dili masustenir ang pagbuhi og daghang hayop sama sa iro dili pugson tungod kay luoy ang mga hayop nga maapektohan sama sa nahitabo sa maong shelter.  -  BDB (BANATNEWS)