Lima ka hepe sa kapolisan sa Probinsiya sa Sugbo girelibohan

CEBU,Philippines — Lima ka hepe sa kapolisan sa Probinsiya sa Sugbo ang girelibohan diin sa niaging adlaw gipahigayon ang turnover ug assumption of office sa mga bag-ong hepe.

Ang mga police station sa Dakbayan sa Naga ug mga lungsod sa Pinamungajan, Dalaguete, Sibonga ug Consolacion ang aduna nay bag-ong hepe sa kapolisan.

Si Police Lieutenant Colonel William Homoc mao nay hepe sa Naga City Police Station; si Police Major Gilfred Baroman mao na usab ang hepe sa Pinamungajan Police Station; si Police Major Clemente Geralde, Jr., ang nilingkod karon nga hepe sa Dalaguete Police Station; Police Major Fort Anthony Valdez mao na ang hepe sa Sibonga Police Station ug si Police Major Antonio Ananayo, Jr. mao na usab karon ang hepe sa Consolacion Police Station.

Ang mga kanhi hepe sa maong police stations gilangkuban ni Police Lieutenant Colonel Junnel Caadlawon sa Naga, Police Major Vincent Zozobrado sa Pinamungajan, Police Major Gilfred Baroman sa Dalaguete, Police Major Rodgene Fudotan sa Sibonga ug si Police Lieutenant Colonel Densing Colipano sa   Consolacion.

Matud ni Police Colonel Rommel Ochave, direktor sa Cebu Police Provincial Office nga gipulihan ang mga kanhi hepe sa maong police stations gumikan kay sobra na sa duha ka tuig ang ilang paglingkod sa posisyon.

Ug magpadala usab sila og suwat sa mayor sa Lungsod sa Santander aron makapili kini sa mamahimong hepe sa kapolisan sa ilang lungsod tungod kay ang kasamtangang hepe niini moabot na usab sa duha ka tuig ang paglingkod sa posisyon.

Si Ochave nibutyag nga adunay gihimong assessment ang Police Regional Office-7 sa accomplishments sa police stations diin adunay pamahayag ang direktor sa PRO-7 Brigadier General Anthony Aberin nga pulihan kadtong mga commander nga nagmika ug wala mohimo sa ilang trabaho.

Apan gihulagway ni Ochave nga ang 50 ka police stations sa Probinsiya sa Sugbo nihimo kini sa ilang trabaho. (BANAT NEWS)