CLO nirekomendar sa pagpasira sa walo ka establisamento

CEBU, Philippines — Gihimo sa Dychangco Group of Companies ang tanang legal nga lakang aron matubag ang mga isyu kalabot sa pagpasira sa ilang mga negosyo ug nagplano usab sila nga makigdiyalogo kang Mayor Michael Rama kabahin niini.

Kini human ang Cebu City Legal Office (CLO) nirekomendar kang Rama nga moluwat og closure order sa walo ka establisamento diha sa Nivel Hills sa Barangay Lahug Dakbayan sa Sugbo ug giingong gidumala sa DGC ang maong mga establisamento.

Ang maong mga esteblisamento naglakip sa Cosmopolitan Funeral Homes, Crystal Palace, Dolce Cafe, Belle Fleur Styling Shop, Ori Izakaya Japanese Restaurant, Belini/Imagene Bar, Holly Dawn Home and Design ug Anzari Restaurant.

Si Renato Dychangco, Jr. sa DGC, sa usa ka lahi nga statement nagkanayon nga dili pa sila kabutyag sa mga merito ug mga detalye sa kaso sa pagkakaron.

Matud ni Dychangco nga naguol ang ilang pamilya sa pagtumaw sa maong isyu pipila lang ka adlaw sa dili pa ang pasko diin unta panahon kini nga malipayon alang sa mga pamilya ug sa mga empleyado.

“Our primary concern is to ensure that our employees, who we treat as part of our family, can celebrate Christmas without worry”, matud ni Dychangco kinsa nibutyag usab nga aduna sila’y himuon nga lakang alang sa pag-apelar sa desisyon.

Nasayrang nga ang DCG adunay 300 ka empleyado.

“The Dychangco Group of Companies has been working for Cebuanos for the last 73 years. Our family business has provided jobs and services contributing to the vibrant economy of Cebu City”, dugang ni Dychangco.

Giingong ang maong isyu naggumikan sa reklamo sa Santos Realty Investment Corporation nga nipasangil nga ang walo ka establisemento ubos sa DCG nag-operate sa usa ka property nga walay pagtugot.

Ang BPLO nihimo og kaugalingong imbestigasyon ug assessment ug nirekomendar niadtong Marso 25, 2022 nga ang duha ka partido adunay posibleng husay apan wala mo uswag.

Human mapupos ang 90 ka adlaw, ang DGC wala nay business permit matud ni kanhi Business Processing and Licensing Office head Jared Limquiaco sa ilang final recommendation letter nga gitumong kang Rama niadtong Hunyo 28, 2022. Si Limquiaco nipasangil nga ang mga establisamento napakyas sa pag-produce sa mga dokumento nga nagpakita sa awtoridad sa paggamit sa property nga gikinahanglan sa pag-isyu og business permit.

Ang legal opinion gikan sa City Legal nga gitumong ngadto kang Rama nagpakita usab nga nakadawat sila sa endorsement gikan sa bag-ong BPLO head Andrew Bautista kalabot sa final recommendation ni Limquiaco. —BDB (BANAT NEWS)