13 anyos nga namatay sa sunog sa Duljo Fatima gilubong na

CEBU, Philippines — Gilubong na ang 13 anyos nga si Wrenchford Cahan human siya nalakip sa pagkapaig atol sa pag-ulbo sa sunog sa may sitio Lower Galile, Barangay Duljo Fatima niadtong Domingo sa kadlawon.

Suma pa ni Portia Basmayor ang pangulo sa Department of Social Welfare and Sevices nga kagahapon gilubong na ang maong batan-on sa may A. Lopez Municipal Cemetery.

Ang DSWS mao ang mihatag og tabang alang sa pagpahiluna sa maong batan-on gikan sa lungon ngadto na sa iyang lubnganan.

Gitug-an ni Basmayor, ila na usab giandam ang paghatag sa mga panginahanglanon sa mga nasunogan sama sa food pack, mga housing materials ug uban pa lakip ang pagkaon nga sulod sa tulo ka adlaw.

Base sa talaan sa DSWS niabot sa 32 ka mga panimalay ang naapektuhan sa sunog, 73 ka pamilya o 283 ka individual ang apektado sa pag-ulbo sa sunog.

Si Cebu City Mayor Raymond Alvin Garcia, nitug-an nga giangkon na sa kagamhanan sa siyudad ang pagpahiluna sa maong bata nga nakalas ug gipaandam na usab ang tanan nga tabang para sa mga nasunogan.

Iyang gitahasan ang taga Department of Welfare and Urban Poor kon DWUP nga makig-alayon sa tag-iya sa luna nga nasunogan human iyang nasayran nga gipanag-iya kini ug pribado nga tawo aron makabalik sa pagtukod sa ilang panimay ang mga biktima sa sunog. (BANAT NEWS)