Paglimpyo sa kanal sa minglanilla gipaspasan
CEBU, Philippines — Subsob ang paglimpyo sa municipal engineering team sa lungsod sa Minglanilla sa mga kanal nga kanunay nga mosuyla panahon sa ting uwan.
Gimando kini ni mayor Rajiv Enad gumikan sa iyang nakita nga dakung suliran sa mga nagpuyo sa dapit sa kanunay nga pagbaha bisan og hinay ra ang uwan.
Lakip sa ilang gihimo ang pagkuha sa mga lapok og bato ingon man ang mga nagtapok nga basura nga hinungdan sa pagkabara sa kanal.
Gihimo sab ang dredging o pagpalawom sa kasapaan aron dili kini dali nga mapuno sa tubig.
Subay niini gipakigtagbuan ni mayor Enad ang engineering team, planning ug kontraktor aron sa paghimo sa drainage system sa Ward 4, Ward 2 ug sa Tulay sa lungsod sa Minglanilla.
Sa nasayran pipila sa mga lugar diha sa lungsod sa Minglanilla ang makasinate og pagbaha nga nakahatag og kahasol dili lang sa mga residente apil na ang mga motorista. — /MEL (BANAT NEWS)
- Latest
