Bucao nipadayag nga mobiya sa Talisay?

CEBU, Philippines — Si incumbent Vice Mayor Alan Bucao nipadayag nga mobiya siya sa Dakbayan sa Talisay kong dili siya ang mamahimong mayor sa siyudad.

Si Bucao nagpapili kining mayor sa siyudad sa umaabot nga eleksiyon sa Mayo 9, 2022 atbang ni incumbent Mayor Gerald Anthony “Samsam” Gullas Jr.

Si Bucao niluwat sa maong pamahayag atol sa programa nga Andiscoveries sa MyTV Cebu.

Matud ni Bucao nga siya ang kataposang tawo nga mobarug sa Talisaynon.

“If ever di ko tagaan og higayon sa akong mga igsuong Talisaynon definitely mobiya nako sa Talisay as a residente”, matud ni Bucao.

Si Bucao nagkanayon nga kong politiko gani bisan og wala na kini sa posisyon anhaon gihapon kini sa mga tawo nga mangayo og tabang.

“Kay mosugot ka ug sa dili politiko gani ka bisa’g wa naka sa imong pagkapolitiko inig human sa eleksiyon anhaon gyud ka”, padayag ni Bucao.

Nasayran nga si Bucao nagdako kini diha sa Barangay Day-as, Siyudad sa Sugbo ug nahimo kining lider sa mga kabataan niadtong tuig 1976.

Nibalhin siya sa kaniadto Lungsod sa Talisay ug nagpapili usab isip opisyal sa maong lungsod nga karon nahimo nang Dakbayan sa Talisay. BDB (BANATNEWS)