Misa bawal pa gihapon sa mga kapilya

CEBU, Philippines — Nakigtagbo ang Emergency Operations Center Cebu City sa mga nagkalain-laing relihiyosong sektor nunot sa pagpangusog sa pagpatuman sa social distancing sa mga relihiyosong kalihokan.

Kagahapon sa buntag si Cebu City Councilor Joel Garganera, Deputy Chief Implementer for Inter-Agency Task Force Emergency Operations Center Cebu City nakigtagbo kang Msgr. Renato Beltran Jr., Chancellor sa Archdiocese of Cebu ug miapilar nga dili lang una magpahigayon og misa sa mga kapilya aron malikayan ang panagtapok sa mga tawo ilabi na sa mga suok nga mga dapit.

Kun mahimo matod pa adto nalang sa mga parokya ipahigayon ang misa.

Giklaro ni Konsehal Garganera nga wala kini nagpasabot nga ang kalihukan sa simbahan ang nakatampo sa pagkasa sa COVID cases sa siyudad apan gihimo nila kini isip panagang. Misanong ra ang simbahan sa hangyo sa EOC nga walay misa nga ipahigayon sa mga kapilya sa nanglabay nga mga buwan.

“Katong mga chapel masses for like labi nag we have fiestas and novena masses unya naay sa panagsabot unsa may atong compromise lang ana so kung mahimo ari lang ba kaha for this month wala lang say mga chapel fiesta masses for this month,” ni Msgr. Beltran pa.

Higpit usab nga ipatuman ang basic health protocols sa kalihukan sa simbahan sama sa pagbawal sa mga menor de edad, kadtong mga senior citizens nga 65 anyos lang nga fully vaccinated ang tugutan nga makasulod sa simbahan ang ipatuman sa EOC.

Sa mga haya sab sa mga minatay ang misa kausa nalang ug mao sab kini ang ipatuman sa mga punerarya nga gikakdang tigumon sa EOC aron mhibawo mahitungod niini.— IBM (BANATNEWS)