Senior citizens modawat na sab sa ilang cash aid

CEBU, Philippines — Makadawat na usab ang mga senior citizen sa Siyudad sa Sugbo sa ilang financial assistance gikan sa kagamhanan karong umaabot Hunyo 26, 2021.

Gipahibalo sa Cebu City Office for Senior Citizens Affairs (OSCA) nga house-to-house distribution gihapon ang pamaagi niini aron dili ma-expose sa daghang tawo ang mga katiguwangan ug malikay sa risgo sa COVID-19.

Gihangyo usab sa buhatan nga pabutangan ug marka ang matag balay sa modawat sa maong benepisyo aron madali ang pag-ila, ug ipa-andam ang kaugalingon nga ballpen ug alcohol.

Samtang alang sa nakadawat na og cash cards, mahimo na kini magamit. Moabot ngadto sa P3, 000 ang madawat sa mga senior citizens nga alang sa buwan sa Abril, Mayo ug Hunyo.

Matud pa ni Jeffrey Ocampo, pangu sa (OSCA) nga ang kinatibuk-ang miyembro sa senior citizens nga mahatagan sa cash assistance mokabat og 87,538, dala na kini sa mga bag-ong miyembro.

Ang opisina nakasumiter na og kapin 10,000 sa Landbank alang sa second batch sa cash cards ug gisusi na ang tagsa-tagsa nga dokumento niini. —/MEL (BANATNEWS)