Garganera niawhag sa IATF nga ipabilin ang mga BIC

CEBU, Philippines — Si Konsehal Joel Garganera sa Dakbayan sa Sugbo niawhag sa Inter-Agency Task Force (IATF) nga ipabilin ang mga Barangay Isolation Center (BIC) samtang hingusgan sa siyudad ang testing ug contact tracing.

Ang maong awhag ni Garganera giluwatan human si Environment Secretary Roy Cimatu nagkanayon nga ang tanang asymptomatic patients sa covid-19 dalhon ngadto sa Noah Complex diha sa South Road Properties (SRP).

Si Cimatu natahap nga ang mga BIC maoy nakaingon sa community transmission diha sa mga barangay tungod kay kasagaran niini anaa nahimutang sa tunga-tunga nga lugar sa barangay.

Si Garganera maoy gitahasan ni Mayor Edgardo Labella pagdumala sa mga BICs.

Matud ni Garganera nga ang mga BIC anaa nahimutang sa mga public school building daplin sa kadalanan ug maayo ang pagka-isolate sa mga pasyente diin aduna kini 24 oras nga staff nga kompleto usab og PPE.

Samtang si Konsehal Dave Tumulak dili motuo nga ang mga BIC maoy nakaingon sa community transmission sa covid-19 sa mga barangay sa siyudad.

Si Tumulak niluwat sa maong pamahayag human usab si Cimatu nipasangil nga posibleng ang BIC maoy hinungdan sa pagkaylap sa virus.

Giangkon ni Tumulak nga siya maoy ni-introduce sa konsepto sa BIC ug nadismaya siya human adunay mga nisaway diha sa internet nga ang maong pamaagi sayop.  /BDB (BANATNEWS)