Kapistahan ni Senior San Jose gisaulog bisan sa ECQ

CEBU, Philippines — Gisaulog sa mga deboto ni Senior San Jose nga patron sa Dakbayan sa Mandaue ang tinuig nga pangilin niini pinaagi sa pagdagkot og kandila ug ang pagpaminaw sa misa diha sa gawas  sa simbahan.

Kini maoy ilang gihimo alang sa pagpahinungod sa patron sa maong dakbayan sa kasaulogan sa iyang kapistahan kagahapon.

Ang siyudad magsaulog sa kapistahan ni Senior San Jose sa Mayo 8 matag tuig.

Si Most Reverend Midyphil Billones maoy nagdumla sa misa pontipika kagahapon sa alas 10:00 sa buntag diin ang mga deboto naminaw kini diha sa gawas sa simbahan.

Ang mga misa sa maong adlaw sa kapistahan ang makita usab sa mga deboto pinaagi sa ilang live streaming sa facebook page sa National Shrine of Saint Joseph sa Dakbayan sa Mandaue.

Si Dennis ug Lydia Aresola nga mga residente sa Barangay Guizo sa maong dakbayan kauban sa pipila ka mga deboto ni Senior San Jose nga nidagkot og kandila diha sa dagkotanan nga gipahimutang sa kaparian.

Kini ilang gihimo human usab sa ilang pagpaminaw sa misa.

Matud sa magtiayon nga naandan na nila ang pagtambong sa misa sa tinuig nga pangilin ni Senior San Jose hinungdan nga nidagkot na lang sila og kandila ug naminaw sa misa diha sa gawas tungod kay dili man sila makasulod sa simbahan niining panahon sa hulga sa coronavirus disese (covid-19).

Matud usab sa maong magtiayon nga ang pagsaulog sa kapistahan ni Senior San Jose karong tuiga maoy labing mingaw itandi sa nangaging katuigan nga magdasok ang mga tawo dili lang sa simbahan lakip na diha sa mga panimalay diin nagtapok ang mga namista gikan sa nagklainlaing lugar. /BDB (BANATNEWS)