Sa 46 mil ka adik, 8 mil ray na-rehab

CEBU, Philippines – Moabot ngadto sa sobra 46 mil ang mga drug surrenderers sa probinsya sa Sugbo, apan wala ra magkatunga ang napaubos sa community based treatment program (CBTP) sa mga lokal nga kagamhanan.

Mao kini ang naa sa datus sa Cebu Provincial Anti-Drug Abuse Office (CPADAO). Matud pa nga moabot lang sa 14,373 ang na enroll sa CBTP sa nagkadaiyang lungsod ug dakbayan.

Gani 8,221 lang ang nakakumpleto sa maong programa ug padayon nga gi-monitor sa mga barangay. Samtang ang uban wala na mopadayon sa programa.

Matud ni Ivy Durano-Meca ang pangulo sa CPADAO ang ubang surrenderers nibalhin na og kapuy-an samtang ang uban nakapangita na og trabaho.

Aduna pud uban nga nangamatay na tungod kay posible nga nibalik og gamit nasakpan dayon napriso.

Ang mga drug surrenders ipaubos kini sa pipila ka bulan nga rehabilitation program ug kun nakakumpleto na niini, padayon silag monitoron sa social welfare sulod sa usa ka tuig.

Kini aron sa pagsiguro nga dili na mobalik sa paggamit sa illegal nga drugas ug wala na malambigit sa uban pang mga kalihokan may kalabotan sa illegal nga drugas.

Matud ni Meca sa 51 ka mga LGUs, 49 na niini ang nakapatuman na sa ilang community based treatment program.  Ang lungsod sa Asturias ug Dakbayan sa Toledo ra maoy wala pa hingpit nga makapatuman niini tungod kay kinahanglan pa ang mga interventionist nga bansayon aron maoy mo-atiman sa mga drug surrenderers. (/IBM)(BANAT NEWS)