Ganti sa kaso ni Silawan wala pa nahatag

CEBU, Philippines – Wala pa gyud madawat ang gitanyag nga ganting salapi sa tawo nga nakatabang sa kapolisan sa pagsulbad sa kamatayon ni Christine Lee Silawan.

Si Lapu-Lapu City Police Office (LCPO) Director Limuel Obon sa iyang pamahayag niingon nga hayan ang gitanyag nga P1 milyon nga ganting salapi gikan sa kagamhanan sa Dakbayan sa Lapu-Lapu mao lang ang madawat sa informants nga adunay dakung natabang sa gihimo nilang imbestigasyon.

Gipasabot niya nga ang pipila ka personalidad nga nisaad usab sa paghatag og ganting salapi napakyas na niining mga panahona sa pagpadangat og mga kasayuran ngadto sa ilang buhatan.

Kahinumduman nga si outgoing Lapu-Lapu City Mayor ug incoming Congresswoman Paz Radaza ang nagtanyag og ganting salapi gikan sa kagamhanan sa dakbayan.

Gawas pa niini adunay tanyag usab nga dugang ganti si Presidential Assistant for the Visayas Michael Lloyd Dino ingon man ang higala niini nga si Philippine Postal Corporation Chairman Norman Fulgencio nga ang tanan mokabat sa kantidad sa P200,000.

Laing tanyag usab sa usa ka retiradong US serviceman nga nagbase sa Leyte nga nisaad sa paghatag sa kantidad nga P500,000 ug ang Cebu Provincial Council for the Welfare of Children nisaad usab og P200,000 ingon man ang Police Regional Advisory Council nga maoy labing unang nitanyag sa paghatag og P100,000.

Matud ni Obon nga sa ilang taho ilang gilakip ang lima ka informants nga ilang gisumetir ngadto sa City Hall ingon man ngadto sa PRAC sa ingon nga paagi ang maong ganting salapi direkta kining madawat sa mga hingtungdan.

Ang maong impormasyon nga nadawat sa kapolisan mao usab  ang hinungdan sa pagkasikop sa 42-anyos nga suspek nga si Renato Llenes kinsa nag-atubang na karon og kasong murder sa korte. (/GMR)(BANAT NEWS)