Mga armas nga expired ang lisensiya ipasurender

CEBU, Philippines – Ang direktor sa Cebu City Police Office (CCPO) Police Colonel Royina Garma niawhag karon sa mga opisyal ug katawhan nga adunay mga expired nga lisensiya sa armas sa pagtahan niini sa kapolisan.

Matud ni Garma nga padayon ang ilang gihimo nga Oplan Katok ug kadtong mga opisyal sa gobiyerno nga adunay expired fire arms giawhag nila sa pagtahan niini sa kapolisan aron mohimo sila og tukma nga proseso.

Gibutyag ni Garma nga aduna sila’y listahan sa mga opisyal ug tawo nga adunay expired firearms hinungdan ilang gihimo ang Oplan Katok.

Matud usab ni Garma nga giuna nila og tuktok ang mga anaa sa listahan nga mga opisyal tungod kay sila man ang modelo sa tanan ug kinahanglang mahimo silang instrumento sa uban.

Apan kong wala na ang ilang mga expired nga armas pwede silang mopakita og affidavit of loss ug kong nabaligya deed of sale ug modangop sila sa police station aron adunay proseso. (/BDB)(BANAT NEWS)