Kabataan sa Mandaue gigiyahan alang sa ilang kaugmaon

CEBU, Philippines — Gihatagan og pagtagad ang  mga programa nga gitumong alang sa kaayohan sa  mga bata nga  libudsuroy sa Dakbayan sa Mandaue  ni Kongresista Jonas Cortes sa ikaunom nga distrito sa Lalawigan sa Sugbo panahon sa iyang administrasyon isip mayor kaniadto sa maong dakbayan.

Si Cortes nipatukod sa “Hope for Mandaue City” diha sa Sitio Dunggoan, Barangay Basak aron dunay mapuy-an ang mga batang libudsuroy ingon man ang mga biktima sa pagpangabuso.

Ang maong mga bata nga maluwas sa kapolisan ug sa City Social Welfare adto sa maong lugar magpuyo diin ubos sila sa pag-atiman sa kagamhanan sa siyudad  tudloan sila sa paglimpiyo sa ilang kaugalingon, pagbaton og maayong pamatasan ug ingon man kabahin sa panginabuhian nga magamit nila panahon nga sakto na sila sa panuigon.

Sa iyang bahin, si Mayor Luigi Quisumbing naghimo kini og nagkadaiyang programa alang sa kabataan sa dakbayan ug lakip niini paghatag kanila og kalingawan.

Sa niaging adlaw atol sa “Fiesta sa Kabataan” nga giapilan sa kapin 2,000 ka bata gihimo usab ang nagkadaiyang kalihokan nga gitumong alang sa kaayohan sa mga bata.

Naglakip niini ang pagpasiugda og diyalogo ang upat ka buhatan sa kagamhanan nga naglakip sa kapolisan, maghuhukom, prosecutor ug social welfare.

Gitinguha ni Quisumbing nga magiyahan ang kabataan sa dakbayan  nga mahimong mapuslanong lumulupyo sa katilingban. (/BDB)(BANATNEWS)