Kita sa ihawan sa Talisay gilaumang mosaka
CEBU, Philippines — Si Konsehal Manuel Cabriana, chairman sa committee on market and slaughter house naglaum nga mosaka pa sa sunod buwan ang kita sa ihawan sa siyudad.
Ang ihawan sa Talisay ubos kini sa “AA” accreditation sa National Meat Inspection Service (NMIS) diin ang karne nga giihaw diha sa ihawan pweding mabaligya sa mga lugar sa nasud. Matud ni Cabriana nga karong buwana hinay-hinay na nga nikusog ang ihaw sa mga hayopan diha sa ihawan diin ang mga karne ipamaligya kini diha sa kamerkadohan.
Giingong mo-average ngadto sa P1.8 milyon ang makolektang kita sa ihawan matag buwan.
Sa matag tuig ang kita sa ihawan nagsaka kini diin panahon sa mga kasaulogan sama sa kalag-kalag ug pasko ubay-ubay ang mga hayopan nga ipaihaw tungod kay kusog usab sa maong mga panahon ang halin sa karne diha sa kamerkadohan.
Ang koleksiyon sa ihawan nga niabot na ngadto sa P1 bilyon dako kaayo kini og tabang sa kinatibuk-ang pundo diin mao kini gamiton alang sa mga proyekto.
Nunot niini, si Cabriana nipahimangno sa mga konsumidor nga dili mokompiyansa sa ilang pagpamalit og karne diha sa merkado tungod kay giingong dunay mga ipalusot nga karne nga isagol og baligya sa karne nga gikan giihaw sa ihawan.
Gipahimangnoan usab niya ang mga manindahay nga unta walay mamintaha o manikas sa ilang mga timbangan aron dili sila masikop ug makabayad og multa. (BANAT NEWS)
- Latest
