Panimawos ang motibo?

CEBU, Philippines — Panimalos sa mga dinakpang mga durugista ang usa sa mga gitan-aw nga mga anggulo sa pagbanhig patay  kang Police Officer 3 Micahel Santinno Cortes ug mga kaubanan didto sa Dakbayan sa Talisay sa miaging adlaw.

Ang direktor sa Cebu Provincial Police Office nga si Police Senior Supt. Manuel Javier Abrugena nagkanayon nga ila pang gipangitaan og katin-awan kon si PO2 Michael Cortez nga anaa sa listahan sa narco-cops ni Presidente Rodrigo Duterte ug ang napatay nga polis usa ra.

"We are still confirming po kung one and the same person. I-refer po namin sa higher office for confirmation," si Abrugena miingon. Sa narco- list ni Duterte niadtong 2016 , adunay PO2 Michael Cortes nga nadestino sa Barili nga naapil niini.

Sigun pa sa hepe sa Talisay City Police Station nga si Police Supt. Marlu Conag nga posibleng gigukod si Cortes sa mga gipanakop niya nga mga durugista kaniadto.

Wala hinuon gisalikway sa mga otoridad ang anggulo sa sugal sanglit gikatahong moapil-apil kini og derby sa manok. Butyag pa ni Conag nga kasamtangan nilang gisubay kon aduna ba kini nakabangi  nga maoy posibleng utok sa maong krimen.

Gisubay usab nila ang tanang mga tambalanan sa Talisay ug mga silingang lungsod kon aduna bay gidala nga napusilan human giingong nakabawos si Cortes pagpusil sa mga mamumuno gamit ang personal niining armas.

Nakuha sa lugar nahitaboan sa krimen ang armas ni Cortes nga kalibre .45, unom ka mga magazine niini ug 11 ka mga kabhang sa maong kalibre.

Aduna sab 36 ka mga basiyo sa kalibre 5.56 mm nga bala alang sa Armalite rifle nga gituohang gikan sa mga mamumuno.

Nasayran nga sakay ang grupo ni Cortes kauban silang Dennis Patiluna ug Jose Soroño, sa SUV Sorento nga adunay plakang JDU-934 apan pagliko nila sa  usa ka eskina gipaulanan sila og bala sa mga armadong lalaki nga nagsakay og mga motorsiklo.

Atol sa hitabo napagan ang 50- anyos nga mamasurahay nga si Cresencia Rangos, 50, taga Barangay Linao sa maong dakbayan. (/IBM)(BANATNEWS)