P17.8M nga building sa city jail sa Mandaue gitukod

CEBU, Philippines — Nikabat ngadto sa P17.8 milyones ang kantidad sa  padayon nga gitukod nga  building sa Mandaue City Jail sa Dunggoan, Barangay Basak, Dakbayan sa Mandaue nga gilaoman nga makatabang alang sa pagpalambo sa kahimtang sa mga binilanggo sa maong jail facility.

Si Mandaue City Jail Warden John Conrad Marcelinol Basilio nagkanayon nga ang Department of Public Works and  Highways (DPWH) ang nagsugod  sa pagtukod niini niadtong Hulyo 2024 ug gikatakdang mahuman ang katukoran sa buwan sa Marso sa sunod tuig.

Matud ni Basilio nga sa higayon nga mahingpit na ang katukoran sa maong proyekto dako kini og ikatabang alang sa pagpalambo sa kasamtangang kahimtang sa mga Person Deprived of Liberty (PDL) sa maong bilanggoan.

Sa kasamtangan ang maong jail facility ang adunay 1,531 ka PDL ug mapaloag  ang kasamtangan nilang kahimtang sa higayon nga mahuman na ang kaugmaran sa gitukod nga bag-ong building sa city jail.                                 

Gipadayag ni Basilio nga ang gitukod  nga bag-ong edipisyo sa mao na unya kini ang magsilbing bag-ong administrative building nga makatabang sa ilang mga personnel sa paghimo og mga pamaagi alang  sa pagpalambo  sa kahimtang sa mga PDL.

Dugang ni Basilio nga tinguha nila ang pagpalambo sa seguridad sa maong jail  facility ilabi na sa mga adlaw nga pagahimuon ang pagbisita  sa mga kabanay sa mga binilanggo. (BANAT NEWS)