P17.2M shabu nasakmit sa duha ka drug stings sa Bohol

CEBU, Philippines — Niabot og P17.2 milyones nga balor sa illegal nga drugas ang nasakmit sa mga operatiba sa Police Drug Enforcement Unit sa Bohol Police Provincial Office (BPPO) sa managlahi nila nga buy-bust operations niadtong Sabado, Nobiyembre 9, 2024.

Sa unang operasyon nahitabo pasado alas-7 sa buntag niadtong Sabado sa Barangay Guiwanon, Lungsod sa Tubigon diin usa ka high value individual ang nadakpan.

Giila ang nadakpan nga si Danilo Rufelle Jr., alyas Melo, 25, residente sa Purok 4, Barangay Pooc Oriental, Tubigon, Bohol.  Nasakmit gikan sa dinakpan ang mga binulto nga ilegal nga drugas nga gisulod of Chinese tea bags nga moabot duha ka kilo nga nagkantidad og P13.6 million.

Sa impormasyon sa kapulisan, ang suspetsado usa ka iladong drug personality nsa Lungsod bsa Tubigon sama sa amahan niini nga notado sab nga drug personality apan namatay  na ug gituohang kining anak maoy nipuli.

Gawas sa duha, duna kini uyoan nga drug personality sab nga napriso karon sa Abuyog Penetentiary sa Leyte ug kini maoy giingong tinubdan sa suplay sa ilang ilegal nga drugas.

Samtang pagkapasado alas-8 sa gabii sa samang adlaw nadakpan sab sa mga operatiba ang laing high value individual sa ilang buy-bust operation sa Barangay Tinago, Lungsod sa Dauis sa maong probinsya.

Nasikop nila si Arvin Embradura, 42, taga Purok-9, Habitat, Barangay Tabalong, Probinsya sa Bohol. Nakuhaan kini og 530 gramos nga shabu nga nibalor og P3.6 million ingon man kalibre .9mm nga armas.

Wala gisalikway sa kapulisan sa Bohol nga posibilidad nga ang mga nasakmit nga mga drugas sa konektado kini niadtong dul-an P400 million nga nasakmit sa pantalan sa Liloan, Southern Leyte gikan sa Mindanao tungod kay pareho ang packaging niini.

Palawman pa sa kapulisan ang ilang imbestigasyon aron mahibaw-an asa giagi ang mga drugas nga nasakmit. (BANAT NEWS)