Probinsiya sa Bohol gidapit alang sa joint session sa Sugbo

CEBU, Philippines — Giimbitar sa hunta probinsyal sa Sugbo ang Probinsya sa Bohol pinaagi ni gobernador Erico Aristotle Aumentado alang sa usa ka joint session karong Nobiyembre 18.

Ang katuyoan niini mao ang paghisgot sa nagkadaiyang aspeto tali sa duha ka probinsya nga mao na lang ang nahabiling mga lalawigan sa rehiyon 7 o Central Visayas.

Kini human sa pagpasar sa Akta Republika 12000 o pag-establisar sa Negros Island Region, o ang pag-ipon sa Negros Oriental, Negros Occidental lakip na sa Bacolod ug sa probinsya sa Siquijor.

“in a recent conference conducted by both Cebu Provincial Government and the Bohol Provincial Government, it was the intent of both provinces’ local chief executives to carry-out a venue for both provinces to conduct consultations and deliberations on the programs and activities for the entire Region VII” pagbasa sa resolusyon ni bokal Glenn Anthony Soco, nga gipasar sa provincial board atol sa regular session niini niadtong Nobiyembre 11.

Sumala usab ni Soco, gitinguha karon nila ang “sisterhood agreement” tali sa duha ka probinsya.

Ang maong joint session makahatag og lugar alang sa duha ka probinsya nga adunay dayalogo sa mga plano ug programa nga makabenepisyo sa duha ka lalawigan isip hiniusang rehiyon siete.

Ipahigayon ang joint session karong Nobiyembre 18, alas 2 sa hapon didto sa Legislative Building sa Kapitolyo.  MEL  BANAT NEWS