Mga magtutudlo gibansay na para sa gipalambo nga K to 12 curriculum

CEBU, Philippines — Gisugdan na sa Department of Education sa Cebu City Division ang pagbansay-bansay sa mga magtutudlo alang sa pagpatuman sa "enhanced" K to 12 curriculum alang sa pagpangandam sa sunod school year ug aron matubag ang “learning gaps” nga nasinati sa mga tinun-an sa panahon sa COVID-19 pandemic.

“Pinaagi niining bag-ong curriculum, ato tanang kabataang dinhi sa Cebu City mahatagan og maayong kaledad sa education,” suma pa ni DepEd Cebu City superintendent Dr. Nimfa Bongo atol sa interview niini sa EduConnect pinaagi sa Sugboanon Channel.

Ang mga pagbansay-bansay ug ang mga seminar nakapokus sa kritikal nga panghunahuna, pag-uswag sa katakus, ang lifelong learning ug posibleng hagit sa enhanced K-12 curriculum.

“Through this continuous professional development, we aim to support our teachers in successfully navigating the changes and maximizing the impact of this revised curriculum in student growth and development,” dugang pa ni Bongo.

Mipasalig si Bongo nga monitoron sa iyang buhatan ang tanang pampublikong tunghaan sa dakbayan sa higayon nga mapatuman na sa DepEd ang bag-ong curriculum.

“This ongoing evaluation will help us make necessary adjustments, promote accountability, and ultimately guarantee that the curriculum effectively enhances the quality of education for all our students,” si Bongo miingon.

Tumong ni Bongo nga maalibyuhan ang nahitabong learning gaps sukad nga miulbo ang COVID-19 pandemic.

Matud pa ni Bongo nga kinahanglan nga personal nga matudluan gyud sa mga magtutudlo ang mga bata nga makamao nga mosulat ug mobasa kun diin mao kini usa sa mga wala kaayo masinati sa mga tinun-an niadtong gipatuman ang modular learning.

Tumong sab ni Bongo nga malakip sa bag-ong curriculum ang pagtudlo sa mga tinun-an ang mahimong mas nasyonalismo ug globally competitive.

“We wanted to produce graduates who passionately love their country and lastly, they should be ready to succeed in life. Ato nang dream nga atong mga estudyante sa Cebu City will become useful citizens in the future,” pulong pa ni Bongo. (BANAT NEWS)