Mga opisyal sa barangay sa Carcar gi-drug test

CEBU, Philippines — Gatusan ka opisyal sa 15 ka barangay sa Dakbayan sa Carcar ang gipaubos sa kinalit nga drug test   atol sa Anti-Crime Summit ug Synchronized Managing Police Operations sa kapolisan ug mga sakop sa Philippine Drug Enforcement Agency.

Matud ni Jonah Pino, Local Government Operations Officer sa dakbayan, nga nagtigum una sila sayo sa buntag diin gituki ang mga pamaagi nga mahimong drug-cleared ang usa ka barangay.

Gisusi pa nila kung aduna bay nisibat apan kadtong mga absent ilang padad-an og suwat ug paesplikaron kung nganong wala motambong sa kalihukan.

Hinoon sumala pa ni Pino nga ang mga opisyal sa dakbayan suportado kaayo  sa mga tigum ug kalihukan batok sa ilegal nga drugas.

Si Kapitan Erwin Alo sa Barangay Poblacion 2 mahinangpon sa gihimong drug test kay parte man kini sa internal cleansing ug isip usab amahan sa barangay haum lang nga mosuporta sila sa programa ni Presidente Rodrigo Duterte.

Gani tinguha niya nga ang tanan niyang sakop ipaubos sa drug test aron sa pagseguro nga walay luna sa iyang pangagamhanan ang mga nalambigit sa ilegal nga drugas.

Ang tigpamaba sa PDEA-7, Leia Albiar, mapasalamaton sa programa diin igo lang sila nipasabot sa mga pamaagi nga mahimong drug-cleared barangay ug uban pa.

Sa laing bahin, hingpit na nga inugurahan ang gitukod nga labing unang Drug Recovery Clinic sa compound sa Mandaue City Hospital. Si Bise Mayor Carlo Fortuna niingon nga paspas kaayo ang kaugmaran sa maong proyekto nga gihatag sa nasudnong kagamhanan.

Ang klinika maoy moatiman sa mga tiggamitan og ilegal nga drugas nga nagtinguha sa pagbiya sa bisyo.

Ang klinika ubos sa pagpadagan sa Department of Health (DOH) ug sa mga doktor sa dakbayan. (BANAT NEWS)