Pamilya ni SPO1 Balili nahiubos sa pasangil

CEBU, Philippines — Daku ang kahiubos sa pamilya ni Senior Police Officer 1 Roderick Balili sa nikatap nga taho nga siya maoy mamumuno kang Von Rian Tecson, ahente sa Philippine Drug Enforcement Agency 7, niadtong Agosto 8.

Ang ginikanan sa maong polis kinsa nihangyo nga dili ipagawas ang pangalan nagkanayon nga maayong polis, igsuon, bana ug labaw sa tanan maayong anak si Balili.

“Dako siyag kawad-on sa pamilya. Mura mig napiang,” matud sa inahan ni Balili.

Nasayran nga sa report sa Balitang Bisdak, gihinganlan ni Cebu City Mayor Tomas Osmeña si Balili nga mao gyud ang nagpaluyo sa pagpamusil.

Ang 40-anyos nga namatay’ng polis kamaguwangan sa napulo ka managsuon.

Matud pa nga bisan pa man og naminyo na kini ug aduna nay usa ka 7-anyos nga lalaki, wala gihapon niya hikalimti ang iyang mga igsuon ug gani siya ang nagpatiwas og paeskwela sa iyang upat ka manghud.

Dugang sa inahan ni Balili nga bisan sa bayranan sa ilang kuryente ug bugas si Balili gihapon ang niabaga niini.

Nasayran nga sa dihang gibanhigan si Tecson, giingong nakabawos pa kini sa iyang mamumuno hinungdan nga nahagba kini ug gitabangan sa back-up kinsa luwan sa usa ka maroon nga SUV Pajero.

Adunay nigawas nga estorya diin gidala sa Cebu South General Hospital sa Dakbayan sa Naga ang samaran nga mamumuno ug gidala dayun sa Cebu Doctor’s University Hospital.

Apan matud sa kadagkuan sa Police Regional Office 7 nga managlahing insidente ang nahitabo kang Balili sanglit giingong aksidente kining naunay sa kaugalingong .9mm nga service firearm samtang nag-surveillance sa Lungsod sa Pinamungajan.

Giingong dihang gitunol sa drayber nga kauban ni Balili ang armas, aksidente niining nakablitan ang gatilyo dihang nakaagi sila og libaong sa dalan hinungdan nga napusilan si Balili. (BANAT NEWS)