‘Piso net’ gihugtan sa pag-monitor sa Lapu-Lapu

CEBU, Philippines — Higpit karon nga gi-monitor sa kagamhanan sa Dakbayan sa Lapu-Lapu ang nagpadayon nga operasyon sa mga “piso net” sa pipila ka barangay sa tinguha nga dili makasulod ang mga tinun-an sa mga oras sa tingklase ingon man panahon nga lapas na ang alas 10 sa gabii.

Nunot sa higpit nga pag-monitor maoy naghimo sa pagpatrolya ang kapolisan nga sakop sa City Mobile Force Company sa Lapu-Lapu City Police Office (LCPO) nga kuyogan sab sa mga barangay tanod.

Sa gihimo nga monitoring sa kapolisan ug mga barangay tanod sa mga barangay nga hingtungdan adunay pipila ka bata nga ilang naaktohan nga nagduwa sa “piso net” nga maoy hinungdan nga ilang gipahimangnoan ang mga nagdumala niini labot sa dili pagpasulod sa mga bata sa dili tukma nga oras.

Kahinumduman nga si Mayor Paz Radaza nagtinguha na unta sa pagdili sa operasyon sa mga “piso net” sa kabarangayan sa dakbayan.

Gipasabot niya nga ang pagdili sa operasyon maoy usa ka paagi nga mapugngan ang isyu sa cyber-pornography ug human trafficking.

Ang maong matang sa operasyon sagad nga nahitabo nga gihimo sa pipila ka molupyo nga naglakip sa Barangay Basak sa dakbayan ug ingon man sa Lungsod sa Cordova ug pipila na niini ang nasikop sa gihimo nga pagpangronda sa kapolisan ug ubang ahensiya.

Gumikan niini si Radaza niingon nga ang siyudad padayon nga magmabinantayon aron dili mausab ang nahitabong cyber-pornography sa Barangay Basak niadtong Abril diin duha ka inahan ang nigamit sa ilang mga anak sa internet pinaagi sa pagpakita og law-ay nga hulagway bugti ang kwarta nga ibayad sa kustomer. (GMR) (BANAT NEWS)