674 ka estudyante napiling scholars sa Paglaum

CEBU, Philippines – Miabot ngadto sa 674 ka kabatan-onan sa Probinsiya sa Sugbo ang hatagan og certificate isip mga scholar sa Paglaum Scholarship program sa Kapitolyo.

Ang nahisgutang mga batan-on mao kini ang nakapasar sa screening alang sa maong scholarship program.

Karong umaabot Hulyo 9 ang gikatakdang pagpanghatag sa Kapitolyo og certificate sa maong mga scholar.

Si Bise Gobernador Agnes Magpale nibutyag nga 500 lang unta ang ilang dawaton apan nahimo na kining kapin 600 tungod kay si Gobernador Hilario Davide, III gikan sa iyang pundo nihatag og dugang P5 milyones alang sa maong scholarship program.

Plano ni Magpale nga sa sunod tuig sayohon na nila ang pagpahigayon og screening sa mga buot mahimong scholar sa Paglaum kini aron nga adunay igong oras pagpahibalo ngadto sa kalungsuran ug kabarangayan kalabot sa maong programa ug mapadad-an og  suwat ang mga nakapasar.

Dugang ni Magpale nga ipaagi nila  sa mensahe sa cellphone ang pagpahibalo sa mga aplikante  tungod kay dali kini nga pamaagi alang sa impormasyon apan kadtong mga lugar o barangay nga walay  klaro ang signal mopadala sila og suwat aron masiguro gyud nga madawat ang impormasyon ngadto sa aplikante. (/BDB)(BANAT NEWS)