Pagbaligya sa Balili property tukion

CEBU, Philippines — Nagplano si Gob. Hilario Davide III nga makigtagbo sa mga opisyal sa City of Naga sunod semana aron nga han-ayon ang unang nasabotan nga plano pagpalit sa siyudad sa kontrobersyal nga Balili property.

Adunay inisyal nga kasabotan ang Kapitolyo ug Naga sa plano sa dakbayan  nga paliton ang 24.7 ektarya nga luna nga anaa nahimutang sa Barangay Tinaan.

Apan sumala ni kanhi mayor Valdemar Chiong nakauyon ang Kapitolyo sa maong property nunot sa wala pagtagad sa ilang plano nga paliton ang Balili property.

Hangtud karon matud pa walay tubag nga nadawat ang Naga gikan sa Kapitolyo bahin sa ilang plano sa maong luna.

"We have to choose the properties nga yuta gyud, katong naay title,  kay 80% ana submerge man," matud ni Davide.

Sumala niya nga unahon nila og tuki ang memorandum of agreement (MOA) tali sa Kapitolyo ug dakbayan sa Naga.

Matud ni Davide nag-amping ang Kapitolyo sa plano bahin sa Balili property kay aduna kini kaso sa Sandiganbayan.

Nakontrobersiyal ang Balili property human kini gipalit sa Kapitolyo sa panahon ni kanhi gobernador Gwendolyn Garcia apan nasuta nga lapad nga bahin niini nag-ubog sa tubig ug di mahitabong matitulohan ug mabaligya kay iya kini sa gobiyerno. (/IBM)(BANATNEWS)