Landfill sa Talisay ipadumala og pribadong kompaniya

CEBU, Philippines — Si Talisay City Mayor Eduardo Gullas mipadayag nga wala siya’y nakitang problema nga pribadong kompaniya ang modumala sa labayanan sa basura sa siyudad ug ingon man ang mokuha sa mga basura.

Matud ni Gullas nga buhaton niya ang tanang makahatag og kaayohan sa siyudad.

Sa pagkakaron ang siyudad mikuha na sa serbisyo sa pribadong indibidwal sa pagkolekta sa ilang mga basura.

Apan gibutyag sa mayor nga wala pa nila matuki o mahisguti sa mga opisyal sa siyudad kalabutan sa pagdumala sa ilang labayanan sa basura ug ingon man ang pagkolekta.

Sayo pa, si city engineer Gamaliel Vicente, Jr. mipadayag sa iyang pag-uyon nga makiglambigit ang siyudad og pribadong kompaniya tungod kay makadaginot kini.

Gipasabot ni Vicente nga lisud kong maguba ang mga garbage truck sama sa nahitabo karon tungod kay maapektohan usab ang pagkolekta sa mga basura.

Ug maoy hinungdan nga nangabang sila og mga truck nga mokolekta sa mga basura.

Apan si City Administrator Rudelyn Navarro nibutyag nga dili mahimong pribadong kompaniya ang modumala sa labayanan tungod kay iyaha man sa siyudad ang tulo ka ektaryang luna diin nahimutang ang sanitary landfill sa Barangay Tapul.

Dugang ni Navarro nga mahimo lang kini nga consortium ang pagahimuon o ang pakig-alayon lang aron matabangan ang siyudad sa pagkolekta sa mga basura. (BANAT NEWS)