Mga kinhason sa merkado gi-monitor

CEBU, Philippines - Nag-monitor karon ang Department of Veterinary Medicine and Fisheries (DVMF) sa kamerkaduhan sa Siyudad sa Sugbo aron maseguro nga wala’y makalusot nga mga kinhason nga apektado sa red tide sa Tagbilaran City ug Dauis, Bohol.

Kini human ang Bureau of Fisheries and Aquatic Resources nipagawas og advisory nga nagpahimangno nga dili una mokaon og kinhason gikan sa nahisgutang mga lugar.

Apan giklaro sa pangulo sa DVMF, Dr. Alice Utlang, nga bisan wala’y advisory nga ipagawas ang BFAR, standard operating procedure na nila ang pagsusi sa mga kinhason nga moabot sa Siyudad sa Sugbo kung may auxiliary permit aron ibaligya sa mga merkado.

Matud ni Utlang nga gawas sa auxiliary permit, magkuha gihapon sila og sample aron ipaubos og eksaminasyoon sa pagseguro nga wala gisagol ang kinhason gikan sa infected areas. Hinoon walay angay kabalak-an ang publiko sanglit negatibo ang resulta sa eksaminasyon nga gihimo sa DVMF.

Sagad sa mga kinhason nga gibaligya sa kamerkaduhan sa siyudad gikan sa Zamboanga, Bohol, Samar ug ang uban sa Isla sa Olango. (BANAT NEWS)