Pahimangno ngadto sa mga motorista ug biyahedor

CEBU, Philippines — Gihangyo ug giawhag sa Cebu City Police Office (CCPO) ang katawhan nga mahimong responsable sa pagmaneho ma-motorsiklo man o sakyanan ilabi na karong panahona, wala ug tuo ang party tungod sa pagsaulog sa Pasko ug pagsugat sa Bag-ong Tuig.

Si Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police Office nagkanayon nga kun momaneho man kinahanglan naa sa saktong panimuot ug kondisyon ang lawas kini aron dili madisgrasya ug dili sab maka disgrasya.

"Importante kaayo mindful ta sa atoang actions para nindot ang atoang pagsugat sa Bag-ong Tuig kung kompleto ang pamilya," sigon ni Macatangay.

Kun nakainom man mas maayong dili nalang mo drive, mopahuway nalang hantod mahuwasan.  Kun mahimo dili magpalabi og inom.

Dangog ang dalan

Samtang nipahimangno sab ang City of Talisay-Traffic Operation Development Authority (CT-TODA) ngadto sa motorista nga maghinay-hinay sa pagmaneho ilabi na karon nga dangog ang kadalanan tungod sa pagsige og uwan.

Si Jonathan Tumulak, pangu sa CT-TODA walay kakapoy sa paghatag og pahimangno aron lang nga mahigmata ang motorista sa pag amping sa pagmaneho.

Matud pa niya nga daghan na nga disgrasya nga ang hinungdan mao ang pag-slide sa mga ligid.

Gawas pa niana, sigoruon gyud nga kondisyon ang lawas sa dili pa pa mokupot sa manobela. Una niini, daghan nga mga panghitabo sa kadalanan sa milabay nga adlaw didto sa probinsya.

Adunay nahimo ra nga nahusay pero ang uban aduna gyud kinabuhi nga nawagtang.

Blow-bag-set

Sa pikas bahin, mipahimangno ang Department of Health Central Visayas sa mga mobiyahe  nga dili malimot sa ilang BLOW-BAG-SET sa dili pa mobiyahe ilabi na niadtong adunay mga kaugalingong sakyanan.

Ang BLOW-BAG-SET naglangkob sa Brakes, Lights, Oil, Water; Battery, Accessories, Gas/Fuel; Self, Electrical ug Tires.

Angayan usab mogamit ang seatbelts ug helmets kay tungod niining simple nga pamaagi makaminos kini sa posibilidad nga kamatayon ug serious injury ngadto sa 50 porsyento.

Dugang pa sa DOH-7 angayan usab planohon ilang rota, ug dili usab mobiyahe kung ubos sa ilimnon nga makahubog o bakaha naka drugas.  Gipadayag sa DOH-7 nga disiplina ang kinahanglan aron mahimong malipayon, mabulokon ug luwas ang pagsugat sa Bag-ong Tuig. Gabriel Bonjoc ug Rowena D. Capistrano/IBM BANAT NEWS