16 minors sa Consolacion gihipos

CEBU, Philippines - Gihipos sa nagpatrolya nga mga polis sa Consolacion ang 16 ka mga minor nga nagpanuigon og 17, 16, 15 ug 14 anyos sa unang gabii sa ilang pagpatrolya sa kabarangayan isip pagpatuman sa Curfew Ordinance sa lungsod.

 Si Police Officer 1 Cresenciano Salagada sa Consolacion Police Station nga nahinabi sa Banat News miingon nga naglakip sa mga barangay nga ilang gisuroy sa ilang pagpatrolya  mao ang Poblacion Oriental, Poblacion del Sur, Tubongan, Casili, Pulpogan ug Nangka.

Matud pa niya ang mga minor de edad ilang gipasakay sa ilang patrol car ug gidala sa ilang buhatan.

Gikan didto ilang gipatawag ang mga ginikanan sa maong mga minor de edad ug gipahimangnoan sila bahin sa ilang responsibilidad ug kabahin usab sa Curfew Ordinance. Gipasabot nila ang mga ginikanan nga mahimong sila maoy prisohon inay ang ilang mga gipasagdang mga anak o ba kaha pamultahon base sa gilatid sa ordinansa.

Human sa mubo nga pasidaan, gi-release ra usab ang mga bata ngadto sa mga ginikanan ug gipapauli.

Samtang sa Brgy. Mantuyong, Dakbayan sa Mandaue  usa ka Ruben Andrew Judilla Sabate, 29, anyos ang gidakop sa kapolisan human naaktohang nagsuyop. Sumala pa ni Police Officer 2 Jasyson Flores sa Presinto 1 sa Mandaue City Police Office (MCPO) ang team nga gilangkoban ni Police Officer 1 Ryan Heyrosa nagpahigayon  og patrolya nunot usab sa gipatuman nga Curfew Ordinance.

Apan ilang naagian ang pundok sa mga batan-on nga naglumba og panagan ug ilang nakuptan si Sabate kinsa dili na menor de edad apan nakita diha sa ilang gikahimutangan ang mga basiyo sa pakete nga adunay mga lama sa gidudahang shabu. Nasakmit gikan sa mga kamot niini ang lighter ug shabu uban sa mga drug paraphernalia. (BANAT NEWS)