Quiblat: Tulo pa ka bagyo ang mosulod sa PAR

CEBU, Philippines — Tulo ngadto sa upat ka bagyo pa ang gipaabot nga mosulod sa Philippine Area of Responsibility sa dili pa motapos ang tuiga sumala pa sa Philippine Atmospheric, Geophysical and Astronomical Services Administration (PAGASA).  Si Engr. Al Quiblat ang pangulo sa PAGASA Visayas miingon nga sa pagkakaron aduna silay gimonitor na usab nga low pressure area (LPA) apan wala kini kahigayonan nga motugpa kini sa kayutaan. Apan bisan pa niini iyang giawhag ang katawhan nga magmabinantayon ug magpaminaw sa luwatan nga lakat sa panahon gikan sa ilang buhatan matag karon ug unya. Si Quiblat nitug-an nga wala gihapoy gitugotan nga makabiyahe gikan sa mga dapit nga aduna pa gihapon storm signal nga giisa.

250 Tonnage

Sa pikas bahin, gitugotan na sa Philippine Coast Guard District Central Visayas ang biyahe sa mga dagkong sakayang pandagat nga adunay 250 gross tonnage pataas.

Ang mga pasahero nga naglinya sa lukatanan og tickets sa Pier uno sa Dakbayan sa Sugbo ang naibtan sa tunok tungod kay sa katapusan makabiyahe na gayud sila human sila nadelatar sa ilang mga biyahe sugod pa niadtong Lunes tungod sa kusog nga hangin dala sa bagyong Kristine.

Kagahapong adlawea,  gipatuman sa PCG ang partial nga paglibkas sa suspension sa mga biyahe sa mga sakayang pandagat apan kadto lang mga 250 gross tonnage pataas nga barko ang makalarga, ang mas gagmay o gaan pa niini dili una makabiyahe.

Ang mga stranded nga pasahero mapasalamaton aa Cebu City LGU ug mga barangay nga misagop kanila diin dili lang ang temporaryong pasilongan kon dili gihatagan usab sila og supply sa pagkaon samtang sila na stranded sa Cebu City. Wala na kaabot og 20 ka mga stranded nga pasahero ang nagpabilin nalang karon sa evacuation area.

PRO-7 Motabang

Sa laing bahin, ang  Police Regional Office(PRO)-7 mi-activate na nila ilang disaster units sa Philippine National Police ug nakig-alayon sa Local Disaster Risk Reduction and Management Office sa nagkadaiyang LGUs sa rehiyon aron makatabang sila sa pagresponde gumikan sa epekto sa Bagyong Kristine.

Una niini, pipila ka mga lugar Luzon ug Bicol Region ang grabeng naapektuhan sa Bagyong Kristine diin daghang kabalayan ang naguba tungod sa baha ug dagan  sab ang mga nibakwit.   IBM  BANAT NEWS