Altas bagsak sa Chiefs
MANILA, Philippines — Dumiretso ang Arellano University sa ikalawang sunod na panalo matapos gibain ang University Perpetual Help System DALTA, 66-59, sa second round ng NCAA Season 100 men’s basketball kahapon sa FilOil EcoOil Centre sa San Juan City.
Binuhay ng Chiefs ang tsansa sa Final Four sa hawak na 5-8 baraha para makatabla ang Altas na nahulog sa two-game losing skid sa kabila ng pagtulong sa bench ni team manager at Ginebra star Scottie Thompson.
Kumabig si Maverick Vinoya ng 20 points, 4 rebounds at 2 assists para banderahan ang Arellano na halos blangkuhin ang Perpetual sa kabuuan ng fourth quarter.
Bumanat ang Chiefs ng 18 points sa final canto at nilimitahan ang Altas sa apat na marka matapos magposte ng isang double-digit lead sa first half.
Nagdagdag si T-Mac Ongotan ng 11 markers kasunod ang 10 points ni Renzo Abiera para sa Arellano na nagmula sa 91-86 panalo sa Lyceum.
Sa unang laro, tinapos ng Colegio de San Juan de Letran ang tatlong dikit na kamalasan mula sa 101-98 double overtime win sa San Sebastian College-Recoletos.
Isinalpak ni Deo Cuajao ang game-winning triple sa huling 15.1 segundo para tumapos na may career-high 34 points at itaas ang Knights sa 7-6 marka.
Nagbalik si Jimboy Estrada mula sa one-game suspension at tumipa ng 30 points, 7 rebounds at 5 assists.
- Latest
