44 porsyento sa mga turista mibisita sa Visayas

CEBU, Philippines — Gipahibawo sa Department of Tourism (DOT) nga ang Visayas adunay dakong papel sa nasudnong turismo, diin 44 porsyento sa kinatibuk-ang tourist arrivals sa nasud ug kapin sa 20 porsyento sa domestic tourism market gikan sa rehiyon.

Atol sa League of Municipalities of the Philippines (LMP) Visayas Island Cluster Conference, si Tourism Secretary Christina Garcia Frasco niingon nga sa kinatibuk-ang porsyento sa turista nga miabot sa Pilipinas, 44 porysento ang mibisita sa Central Visayas, Western Visayas, ug Eastern Visayas.

Dugang ni Frasco, dako usab ang papel sa rehiyon sa domestic tourism market, nga nagtampo og kapin sa 20 porsyento sa kinatibuk-ang portfolio nga adunay kapin sa 9.67 milyon nga natalang mga overnight travelers.

Gipasigarbo usab ni Frasco ang "award-winning" nga mga destinasyon nga mao ang Boracay ug Cebu, uban sa mga inisyatiba sa DOT sama sa Tourism Rest Areas (TRAs) sa Medellin, Carmen, Moalboal, ug Carcar sa Cebu, ug Dauis sa Bohol.

Gidayeg usab niya ang LGUs sa Visayas sa ilang innovative tourism infrastructure proposals pinaagi sa Tourism Champions Challenge (TCC), nga nagpasiugda sa mga mananaog nga lungsod sama sa Tubigon, Bohol alang sa volcanic plug niini; Badian, Cebu alang sa community tourism facility niini; Silago, Southern Leyte alang sa eco-heritage museum; Victorias City, Negros Occidental alang sa birdwatching site sa Gawahon Ecopark; ug Panay, Capiz alang sa coastal infrastructure project niini.  MEL BANAT NEWS