Truck sa bombero giposposan atol sa pagresponde sa sunog

CEBU, Philippines — Nabuak ang windshield sa firetruck sa Barangay Mambaling Disaster and Fire Brigade human dunay grupo sa mga indibidwal ang nihapak og gahi nga butang sa windshield atol sa ilang pagresponde sa sunog sa sitio Lower Galile, Barangay Duljo Fatima, siyudad sa Sugbo kagahapon sa kadlawon, Enero 5, 2024.

Suma pa ni Luilyn Vergara, personnel sa Barangay Mambaling Disaster and Fire Brigade nga nahinabi sa DYSS Super Radyo Cebu nga dihang naabot sila sa fire scene dili momenus sa napulo ka indibidwal ang niduol atubangan sa ilang firetruck ug gihapak ang windshield og gahi nga butang.

Gihulagway niya nga hubog ang maong mga indibidwal nga mihapak sa windshield sa firetruck.

Matud niya, duna say lima ka mga fire victims ang giingong gusto nga unahon sa pagpasirit og tubig ang ilang balay nga nasunog.

"Basin galagot sila kay gusto nila unahon ang ilang balay seguro", ni Vergara pa.

Apan gipasabot ni Vergara nga base sa ilang protocol kinahanglan nila unahan kadtong mga balay nga wala pa naapektuhan aron naa pa silay masalbar.

"Ang protocol baya namong mga responder nga dapat unahon ang wala pa gyud maapektuhi, para naa pami masalbar ba", dugang ni Vergara.

Sa mga indibidwal nga nihapak og gahi nga butang sa windshield sa firetruck usa nila ang gidakop nga ginganlan og Rafael Villaver, 42 anyos, residente ra sab sa naasoy nga dapit apan ang uban nakasibat.  Nabalhog karon sa Mambaling Police Station si Villaver ug gikatakda kining pasakaan og tukma nga kaso. — /MEL (BANAT NEWS)