13-anyos napaig sa sunog sa Duljo Fatima

CEBU, Philippines — Usa ka 13-anyos nga batang lalaki ang nakalas human niulbo ang sunog sa Sitio Galeli, Barangay Duljo Fatima ning Dakbayan sa Sugbo, kagahapon sa kadlawon adlaw nga Domingo.

Ang nakalas mao si Wrenchford Cahan, residente sa dapit kung asa nagsugod ang sunog.  Ang sunog kay naglambigit og residential houses nga giingong nagsugod sa panimalay ni Marites Ybañez.

Walay laing naangol sa maong sunog apan dili mominos sa 25 ka panimalay ang apektado diin 20 ang hingpit nga naugdaw ug lima ang nakan-an sa kalayo.

Ang maong sunog giisa lang ngadto sa 1st alarm kay nakontrolar ra kini dayun ug napawong tanan alas 4:23 apan nagbilin og danyos nga P900,000.

Gikataho nga 77 ka pamilya o 227 ka tawo ang nawad-an og pinuy-anan.  Gipaubos pa sa imbestigasyon sa kabomberohan ang hinungdan niini.

Ang mga residente sa dapit nihulagway sa namatay nga buotan ug gisagop lang kini sa mga Ybañez gikan sa drop-in facility sa siyudad.

Gituohan kini nga na trap kay paspas ang pagdako sa kakayo ug hagip-ot ang maong dapit.

Ang mga nagpuyo sa balay nibutyag nga diha nila nakit-an ang kalayo sa ubos nga bahin sa hagdanan. Nagduda ang uban nga upos sa sigarilyo ang sinugdanan niini.

Si Loreto Clemente, usa sa mga nasunogan nitug-an nga buwan pa nila gisagop ang maong bata. Nakamata nalang sila tungod sa grabeng kainit samtang sila natulog apan uwahi na kay dako na ang kalayo ug nagiyahay nalang sila og ikyas uban sa iyang mga gagmay nga anak.

Nangatkat sila sa taas kaayo nga building aron lang mabuhi ug gani giitsa niya sa kasagbot ang mga bata gikan sa building aron masalbar ug nagpasalamat siya nga wala ra nangaunsa nila.

Wala pa masayod si Clemente kung unsay hinungdan sa pag-ulbo kay dako naman ang kayo nga ilang nakita.

Ang Department of Social Welfare and Services nakatala 35 ka mga panimalay nga apektado ug nanghatag na sila og pagkaon sa mga nasunogan nga kasamtangan nga gipahimutang sa barangay hall.

Gitug-an ni Portia Basmayor ang hepe sa DSWS sila usab ang naggasto sa tanan panginahanglanon alang sa paghipos sa nakalas nga bata. — /IBM (BANAT NEWS)