P300 mil pa-blesingan sa tambalan, lola nailad
CEBU, Philippines – Mokabat sa P300 mil ang nasakiyo sa usa ka lalaki gikan sa usa ka lola nga iyang giilad nga dad-on ang kwarta niini kay pa-blesingan sa kaila nga manambal pasado ala una sa niaging hapon sa Talamban, Dakbayan sa Sugbo.
Wala’y laing nahimo si Victoria Bingtan, 79, taga Paril, Cebu City, human siya nailad.
Ang biktima giingong gitabangan sa lalaki sa paglabang sa dalan sa Talamban dapit sa San Isidro Parish School aron pagpalit og tambal sa botika.
Apan sa iyang pakig-estorya niingon ang lalaki nga may kaila siya nga tambalan nga makatabang sa biktima sa iya’ng sakit.
Napatuo sa lalaki ang biktima ug gipasakay sa motor ug nisulod sila sa bangko sa Maguikay, Dakbayan sa Mandaue aron pagkobra og kwarta nga kapin sa P300 mil.
Human makakobra, giingnan sa lalaki ang biktima nga mamalik sila sa Talamban aron makigkita sa tambalan.
Apan pagbalik nila sa Talamban Proper niingon ang lalaki nga iya lang una nga dad-on ang kwarta sa mananambal aron ma-blesingan.
Gihatag sa biktima ang iya’ng bag apan wala na gyud nibalik ang lalaki.
Nakuha hinuon sa kapolisan ang picture sa lalaki tungod sa closed circuit television camera footage sa bangko apan wala pa kini nila mailhi. (/GMR) (BANAT NEWS)
- Latest
