2 babaye sa prisohan nagpaabot sa Bag-ong Tuig

CEBU, Philippines - Nadakpan sa kapolisan ang duha ka babaye nga tigpayuhot og ilegal nga drugas sa Sitio Rattan, Barangay Tanke, Dakbayan sa Talisay niadto’ng Miyerkules sa gabii.

Ang mga nadakpan nailhan nga sila si Roquilla Cabigon, 42, ug Monette Hoybia, 20, dalaga, pulos nagpuyo sa nahisgutang lugar.

Sila si Insp. Windell Abellana uban sa iya’ng kaubanan sa Talisay City Police ang dali nga niresponde human adunay nitawag kanila aron sa pagsumbong sa ilegal nga kalihukan sa duha ka babaye.

Pag-abot sa mga polis, wala na kadagan pa ang duha ka suspek ug sila gipangrekisa.

Nakuhaan og 34 ka gagmay'ng putos sa shabu si Cabigon samtang kang Hoybia 36 kabuok nga gibanabana nga moabot sa P37,760 ang kantidad.

Gidala ang duha ka dinakpan sa Talisay City Police Station ug gipangbalhug sa prisohan diin sila nisugat sa Bag-ong Tuig. (BANAT NEWS)