Seniors nga BHW giparetiro, P10 mil pabawon

CEBU, Philippines – Wala magdahom nga makadawat og daku-daku nga pabawon ang mga senior citizens nga Barangay Health Workers hinungdan nga usa kanila ang nihilak sa kalipay.

Si Felipa Vequiso, 68-anyos, biyuda ug BHW sa Gawi, Lungsod sa Oslob sukad pa niadtong 1984, ang nagsige pa og hilak dihang nahinabi sa mga tigbalita human siya nakadawat sa P10,000 nga pabawon. “Ang akong natuloan sa luha nga naabotan ko niini’ng tuiga kay kini’ng tawo kung kuhaon sa Ginoo wa ta’y mahimo,” matud niya.

“Ang akong pagserbisyo bisan og wala ko’y madawat kinasing-kasing, mahinumdum ko sa akong kaagi kung duna pa kahay makasuon sa akong gibuhat sa gidugayon nako nga nagserbisyo,” matud ni Nanay Felipa.

Sulod sa 25 ka tuig siya nga nagserbisyo isip BHW sa ilang barangay tungod kay matud niya nga unom ka tuig na ang nakalabay siyang niretiro na apan bisan pa niini padayon gihapon siya sa boluntaryong pagserbisyo.

Giasoy ni Nanay Felipa nga kaniadto hatagan lang sila og P25 matag buwan sa barangay nga magamit nila og pamasahe sa ilang paglibot-libot sa ilang lugar aron manghatag og vitamins, manimbang sa mga bata ug mag-awhag sa mga nagsabak ug masakiton nga moadto sa sentro aron magpahiling sa doktor.

Ang mga BHW isip mga frontliner sila usab ang moayuda sa mga midwife ug doktor kung magpaanak kung wala’y nurse. Sila usab ang unang moatubang sa mga masakiton nga moanha sa sentro.

Giasoy ni Nanay Felipa nga pipila ka tuig silang nag-antos nga P25 lang ang madawat apan wala nila kini igsapayan hangtud nga ang barangay nihatag na kanila og P100 matag tulo ka buwan. Human sa P100 matag tulo ka buwan nahimo nang P50 matag buwan ang ilang madawat nga honorarium hangtud nga niining ulahi niabot na sa P500 matag buwan. Apan bisan pa man niini niantos siya tungod kay gusto usab siyang makatabang sa ilang mga silingan nga magmasakiton ug kadtong mga nagsabak.

“Maluoy lang ko sa among mga silingan wala bayay moaplay kaayo (BHW) sa una kay wala bayay sweldo unya nagkinahanglan sila og tabang,” ni Nanay Felipa pa.

Matud ni Nanay Felipa nga duna siya’y magamit karon sa ilang noche buena sa pagsugat nila ug sa iyang mga apo ug ulitawo nga anak sa Bag-ong Tuig.

Laing BHW kinsa nagpanuigon na karon og 76-anyos ang nipaambit usab sa iyang kasinatian.

Si Ofelia Ampalayo, BHW sa Kalangkang, Lungsod sa Badian nagserbisyo sukad pa niadtong 1982.

Si Nanay Ofelia kinsa usa ka dalagang ulay niasoy usab sa iyang kasinatian nga kaniadto siyang usa lang ang motungas sa bukirang lugar sa ilang barangay.

“Ang akong kauban nisurender tungod kay matud niya wala mi makuha sa among gihimo unya kapoy,” butyag ni Nanay Ofelia.

“Ako nilahutay gyud ko kay gidasig man ko sa among midwife nga mag-antus lang kay sa umaabot duna gyud ko’y mapaabot, gitanum to nako sa akong huna-huna unya naa gyud diay kalipay nga maabot,” subay pa ni Nanay Ofelia.

Sama kang Nanay Felipa, si Nanay Ofelia nagkanayon usab nga maluoy usab siya sa mga nagkinahanglan og tabang ilabi na kadtong mga masakiton.

Giasoy ni Nanay Ofelia nga dihay higayon nga mismo siya’y nidala sa masakiton nila’ng silingan ngadto sa pribado’ng doktor diin ang bayad sa habal-habal nga ila’ng gisakyan ug sa bayad sa doktor iyang giutang o siya maoy nipiyansa tungod kay ang masakiton wala man kini ikabayad.

“Maluoy man gyud ko anang naay masakit, di gyud nako kapugngan matandog gyud akong kasing-kasing magtan-aw anang nag-antos sa kasakit unya wala’y nag-atiman tungod sa kapobrehon unya ang ginikanan walay kuwarta,” paambit ni Nanay Ofelia.

Dugang ni Nanay Ofelia nga kung wala pa siya moboluntaryo og serbisyo daghan sa ilang mga silingan ang mamatay tungod sa gihambin nga sakit ug wala’y makatabang nila ug wala’y makagiya kung unsay ilang buhaton.

Si Bise Gobernador Agnes Magpale nibutyag nga 48 ka BHW nga mga senior citizens na ug giparetiro na sa serbisyo ang nakadawat og P10,000 matag usa kanila nga pabawon. – /GMR) (BANAT NEWS)